نگران نیوز
سری نگر //لیفٹیننٹ گورنر منوج سنہا نے اننت ناگ میں منشیات سے پاک جموں و کشمیر مہم کے حصہ کے طور پر پد یاترا میں شمولیت اختیار کی۔ ایک عوامی اجتماع سے خطاب کرتے ہوئے لیفٹیننٹ گورنر نے عوام سے اپیل کی کہ وہ منشیات کے خلاف اس جنگ کو جیتنے کے لیے خاموشی کو توڑیں اور معاشرے کے تمام طبقات کو منشیات کی لت کے خطرات کے بارے میں ایک آواز میں بات کرنی چاہیے۔لیفٹیننٹ گورنر نے کہا”منشیات کی لت کے چیلنج کو پورے معاشرے کے نقطہ نظر سے ہی ختم کیا جا سکتا ہے۔ اب سے، یونین ٹیریٹری کے ہر کونے میں، چاہے اسکول، کالج، خاندان، کھیلوں کے میدان، وارڈ، گائوں، یا تھیٹر کے اسٹیجزہوں، مضبوط عزم کے ساتھ اس مقصد کے لیے آواز اٹھائیں،” ۔لیفٹیننٹ گورنر نے کہا کہ منشیات کے خلاف اس جنگ میں انتظامیہ اور معاشرے کو منشیات اور دہشت گردی کے درمیان تعلق کو سمجھنا چاہیے اور اسے شکست دینے کے لیے سب کو مل کر کام کرنا چاہیے۔انہوں نے کہا”ہمارا پڑوسی ملک ایک مقصد کے تحت جموں کشمیر میں منشیات سمگل کر رہا ہے، منشیات کی رقم منشیات سمگلروں کے ذریعے نارکو محل بنانے کے لیے استعمال کی گئی ہے اور منشیات کی رقم کا ایک بڑا حصہ دہشت گردی اور بنیاد پرستی کے لیے استعمال کیا جا رہا ہے۔ جہاں ایک طرف منشیات جموں کشمیر کے نوجوانوں کے مستقبل کو تباہ کر رہی ہیں، وہیں دوسری طرف، دہشت گرد تنظیمیں ہمارے بھائیوں اور بہنوںکا خون خریدنے کے لیے اس پیسے کو استعمال کر رہی ہیں۔ لیفٹیننٹ گورنر نے کہاکہ دہشت گردی کے اس نیٹ ورک نے کئی دہائیوں سے جموں کشمیر کی نسلوں کو تکلیف دی ہے۔ اسی لیے میں ہمیشہ کہتا ہوں: منشیات کی لت اور دہشت گردی الگ الگ چیلنجز نہیں ہیں بلکہ یہ ایک ہی مسئلے کے دو چہرے ہیں۔ اور میں آپ سب سے وعدہ کرتا ہوں کہ ہم اس وقت تک آرام سے نہیں بیٹھیں گے جب تک ہم اسے شکست نہیں دے دیتے۔لیفٹیننٹ گورنر نے پولیس اور سول انتظامیہ سے کہا کہ وہ اننت ناگ کی ہر پنچایت کا احاطہ کریں اور خاص طور پر اگلے 71 دنوں کی مہم میں ضلع کے کمزور علاقوں تک پہنچیں۔”اننت ناگ ضلع میں منشیات سمگلروں کے نیٹ ورک کو فیصلہ کن دھچکا لگایا جا رہا ہے۔ 11 اپریل سے اب تک اننت ناگ میں سب سے زیادہ 108 این ڈی پی ایس کیس درج کیے گئے ہیں۔ منشیات کے کالے دھن سے بنائے گئے 3.5 کروڑ روپے کے نارکو محلوں کو خاک میں ملا دیا گیا ہے۔ 22 گاڑیوں کے لائسنس اور 28 گاڑیوں کو ضبط کر لیا گیا ہے۔ قانون کی خلاف ورزی پر 13 ادویات کی دکانوں کو سیل کر دیا گیا۔لیفٹیننٹ گورنر نے کہاکہ میں اننت ناگ کے لوگوں کو یقین دلاتا ہوں کہ ایک بھی سمگلر کو نہیں چھوڑا جائے گا، اور منشیات کی اسمگلنگ میں ملوث پوری مشینری کو جڑوں سے اکھاڑ پھینکا جائے گا۔لیفٹیننٹ گورنر نے کہا کہ خواتین اور نوجوان منشیات کے خلاف اس جنگ کی سب سے بڑی طاقت ہیں۔ انہوں نے کہا کہ اگر خاندان کا کوئی فرد یا پڑوسی کا نوجوان گمراہ ہو رہا ہے تو خواتین اور یوتھ کلب کے ممبران کو چاہیے کہ وہ انہیں دوبارہ اصلاح کی راہ پر لائیں اور ضرورت پڑنے پر انتظامیہ سے مدد لیں۔لیفٹیننٹ گورنر نے کہا”میں کھلاڑیوں، اساتذہ اور تمام مذہبی رہنماں سے اپیل کرتا ہوں کہ وہ اگلے 71 دنوں کو بیداری اور بحالی کی مہم کے لیے پورے دل سے وقف کریں، اور جموں کشمیر کو منشیات سے پاک بنانے کا عہد کریں‘‘۔لیفٹیننٹ گورنر نے کہامذہبی رہنمائوں کو عوام کے رہنماسمجھا جاتا ہے۔ میں چاہتا ہوں کہ وہ نوجوانوں کو روحانی اور اخلاقی رہنمائی فراہم کریں اور انہیں منشیات کے خطرات سے آگاہ کریں۔ میں دہرانا چاہتا ہوں کہ یہ جنگ صرف انتظامیہ کی نہیں ہے۔ یہ معاشرے کی اجتماعی جنگ ہے۔ آئیے اجتماعی وعدہ کریں کہ ہم اپنے گائوں اور محلوں میں منشیات فروشوں کو پنپنے نہیں دیں گے۔ ہم منشیات کا شکار ہونے والے نوجوانوں کی بحالی کریں گے۔ مجھے پختہ یقین ہے کہ جب لوگ کسی مقصد کے لیے کھڑے ہوتے ہیں تو ان کی طاقت ہزار گنا بڑھ جاتی ہے، ۔لیفٹیننٹ گورنر نے دہشت گردی کے شکار ہر خاندان کو انصاف فراہم کرنے کے اپنے عزم کا اعادہ کیا۔اس موقع پر لیفٹیننٹ گورنر نے ضلع میں 20.60 کروڑ روپے کے مختلف کھیلوں کے بنیادی ڈھانچے کے ترقیاتی منصوبوں کا سنگ بنیاد رکھا۔ ان میں جبلی پورہ میں کھیل گاوں کا جدید کھیلوں کا انفراسٹرکچر اور رہائشی سہولت(کھیل بھون) مرحلہ-1 چکی کمال مونگھل میں کھیلوں کی سہولیات کی توسیع؛ نیلندرسو میں سپورٹس کمپلیکس کی تعمیر نو اور ہرموہلہ رنبیر پورہ میں اسٹیڈیم کی ترقی شامل ہے۔
