مانیٹرنگ//
کولگام//ہماری اجتماعی کوششیں ہمارے گاؤں کو مزید صاف ستھرا اور خوبصورت بنا سکتی ہیں، اور آئیے ہم مل کر اس مشن میں آگے بڑھنے کے لیے ہاتھ بٹائیں۔ ڈپٹی کمشنر کولگام ڈاکٹر بلال محی الدین بھٹ نے عوام سے یہ اپیل کی۔ یہاں بلاک ڈی ایچ پورہ میں منعقدہ ایک میگا شکایات ازالہ کیمپ کے دوران انہوں نے کہا کہ ہم کر اپنے گاؤں کو مزید صاف اور خوبصورت بناسکتے ہیں۔شکایات کا ازالہ کیمپ جموں و کشمیر حکومت کے بلاک دیوس اقدام کے ایک حصے کے طور پر منعقد کیا گیا تھا۔اس شکایات کے ازالے کیمپ میں نندی مرگ، یاریخہ، کھل، احمد آباد، کورسربل، لائسو اور دیگر علاقوں کے پی آر آئی کے اراکین اور لوگوں کے وفود نے شرکت کی اور ڈی سی کو اپنے مسائل اور شکایات سے آگاہ کیا، اس کے علاوہ انہوں نے اپنے علاقوں میں ترقیاتی ضروریات کے مختلف مطالبات بھی پیش کئے۔ڈی سی نے لوگوں کی تمام شکایات اور مسائل تحمل سے سنے اور کچھ فوری نوعیت کی شکایات کا موقع پر ہی ازالہ کیا گیا۔افسران اور محکمہ جات کے سربراہان نے اپنے محکموں سے متعلق لوگوں کے سوالات اور شکایات کے جوابات بھی دیئے۔ڈی سی نے ایگزیکٹیو انجینئر پی ایم جی ایس وائی کو ہدایت دی کہ پومبے آڈیجن روڈ کی مرمت جلد از جلد مکمل کریں۔ایڈیشنل ڈپٹی کمشنر وقار احمد گیری، اے سی آر میر امتیاز العزیز، ایس ڈی ایم نور آباد بشیر الحسن، اے سی ڈی محمد عمران خان، اے سی پی شرجیل علی، ایگزیکٹیو انجینئرز، اے آر ٹی او، بی ایم او، زیڈ ای او اور دیگر افسران بھی موجود تھے۔دریں اثنا، بلاک دیوسر اور کولگام میں شکایات کے ازالے کے کیمپس بھی منعقد کیے گئے جہاں افسران لوگوں کے مسائل اور شکایات سننے اور ان کے ازالے کے لیے موجود رہے۔
