نیوز ڈیسک//
پاکستان ٹیم کے سابق فاسٹ بولر عاقب جاوید نے بھارتی بولرز جسپریت بمراہ اور محمد شامی کی بولنگ کی تعریف کردی۔
گزشتہ روز ورلڈکپ کے 29 ویں میچ میں بھارت نے دفاعی چیمپئن انگلینڈ کو 100 رن سے شکست دے کر ایونٹ میں مسلسل چھٹی کامیابی حاصل کرتے ہوئے سیمی فائنل میں پہنچنے کا راستہ بہت آسان کرلیا، تاہم انگلینڈ کو 6 میچز میں سے پانچ میں شکست ہوئی۔
بھارت نے مقررہ 50 اوورز میں 9 وکٹوں کے نقصان پر 229 رنز بنائے اور انگلینڈ کو جیت کے لیے 230 رنز کا ہدف دیا جس کے تعاقب میں انگلش ٹیم 129 رنز پر ڈھیر ہوگئی۔
بھارت کی جانب سے محمد شامی نے 7 اوور میں 22 رنز دے کر 4 کھلاڑیوں کو آؤٹ کیا، جسپریت بمراہ نے 32 رنز دے کر 3 جب کہ کلدیب یادیو نے 8 اوور میں 24 رنز دے کر 2 وکٹیں حاصل کیں۔
تاہم نجی ٹی وی کے پروگرام میں سابق قومی کرکٹر عاقب جاوید نے بھارتی بولنگ کی تعریف کرتے ہوئے کہا کہ ورلڈ کپ میں جسپریت بمراہ اور محمد شامی جیسا کوئی بولر نظر نہیں آرہا۔
انہوں نے کہا کہ جہاں پر گیند اسپن ہوتا ہے وہاں پر سیم بھی ہوتا ہے بھارت نے بڑی ایکوریٹ بولنگ کی ہے، محمد شامی تجربہ کار بولر ہیں انہوں نے دو میچ کھیلے ہیں اور دونوں میں مین آف دی میچ رہے ہیں، بمراہ بھی لائن و لینتھ میں بولنگ کرتے ہیں سیم بھی کرتے ہیں۔
ایک سوال کے جواب میں عاقب جاوید نے کہا کہ آپ جتنے بھی تجربہ کار ہوں پچ کو ایک حد تک پڑھ سکتے ہیں، میچ سے پہلے پلان بناتے ہیں کہ پہلے بیٹنگ کرنی ہے اور 350 رنز اسکور کرنا ہیں لیکن جب اوپنرز میدان میں اترتے ہیں تو بولنگ کا سامنا کرتے ہوئے پچ کچھ اور ہی کہہ رہی ہوتی ہے۔
عاقب جاوید نے کہا کہ پھر بیٹرز پلان بناتے ہیں کہ اب اس وکٹ پر 270 سے 280 بنانے ہیں، لکھنؤ کی وکٹ پر فاسٹ بولر نے زیادہ وکٹیں لی ہیں اور بھارتی بولرز نے لائن و لینتھ میں بولنگ کی ہے۔
