وزیر اعظم نریندر مودی 11 اور 12 مارچ کو گجرات کے اپنے دو روزہ دورے کے ایک حصے کے طور پر جمعہ کو احمد آباد میں روڈ شو کریں گے اور پنچایتی راج اداروں کے ایک لاکھ سے زیادہ منتخب نمائندوں کی ایک ریلی سے بھی خطاب کریں گے۔ ریاست کے ایک بی جے پی لیڈر نے یہ جانکاری دی۔ 10 مارچ کو پانچ ریاستوں میں اسمبلی انتخابات کے نتائج کا اعلان ہونے کے ایک دن بعد مودی اپنی آبائی ریاست کا دورہ کرنے والے ہیں۔ گجرات میں سال کے آخر میں اسمبلی انتخابات ہونے والے ہیں۔ اپنے دو روزہ دورے کے دوران، وزیر اعظم احمد آباد میں کھیل مہاکمب کا افتتاح بھی کریں گے اور گاندھی نگر ضلع میں نیشنل ڈیفنس یونیورسٹی کے پہلے کانووکیشن سے بطور مہمان خصوصی خطاب کریں گے۔ بی جے پی کی گجرات یونٹ کے سربراہ سی آر پاٹل نے نامہ نگاروں کو بتایا، ’’وزیراعظم نریندر مودی 11 مارچ کی صبح احمد آباد ہوائی اڈے پر پہنچیں گے۔ وہاں سے وہ کملم (گاندھی نگر میں ریاستی بی جے پی ہیڈکوارٹر) تک روڈ شو کریں گے۔ راستے میں چار لاکھ لوگ ان کا استقبال کریں گے۔ ,انہوں نے کہا کہ روڈ شو کے دوران مختلف غیر سرکاری تنظیمیں (این جی اوز) تنظیمیں، بی جے پی کارکنان اور مودی کے خیر خواہ وزیر اعظم کے پہلے سے طے شدہ مقامات پر موجود ہوں گے۔ پاٹل نے کہا کہ کملم میں مودی بی جے پی کے ارکان پارلیمنٹ، ایم ایل ایز، عہدیداروں اور ریاستی ایگزیکٹو کے ارکان سے بات چیت کریں گے۔ انہوں نے بتایا کہ اسی دن کی شام کو مودی احمد آباد کے جی ایم ڈی سی گراؤنڈ میں مہا پنچایت سمیلن – ‘مارو گام، مارو گجرات’ سے خطاب کریں گے۔ جس میں تعلقہ اور ضلع پنچایت ممبران اور میونسپل کونسلرز سمیت 1.38 لاکھ سے زیادہ منتخب نمائندے شرکت کریں گے۔ ایک عہدیدار نے بتایا کہ مودی ہفتہ کی صبح مہمان خصوصی کے طور پر نیشنل ڈیفنس یونیورسٹی کے کانووکیشن کی تقریب میں شرکت کریں گے۔ وہ کانووکیشن خطاب کریں گے اور مرکزی وزیر داخلہ امت شاہ کے ساتھ اسٹیج شیئر کریں گے، جو صدارتی خطاب کریں گے۔ پاٹل نے کہا کہ اس کے بعد مودی شام کو کھیل مہاکمب پروگرام کا افتتاح کریں گے۔ انہوں نے بتایا کہ اس پروگرام کے لیے 47 لاکھ سے زیادہ لوگوں نے رجسٹریشن کرایا ہے۔ اس کے تحت ریاست بھر میں 500 سے زیادہ مقامات پر مختلف کھیلوں کا انعقاد کیا جائے گا۔ گجرات حکومت کے سرکلر کے مطابق، کھیل مہاکمب کو مرکز کے آزادی کا امرت مہوتسو پروگرام کے تحت ایک تاریخی واقعہ قرار دیا گیا ہے۔ اس مہاکمب کے تحت اسکول اور کالج کے طلبہ کی حوصلہ افزائی کے لیے مختلف کھیلوں کے پروگرام منعقد کیے جائیں گے۔ کھیل مہاکمب کے دوران پانچ مختلف زمروں میں کھیلوں کے مقابلوں کا انعقاد کیا جائے گا۔
