لاہور:پاکستان تحریک انصاف کے چیئرمین اور سابق وزیر اعظم عمران خان کی پنجاب کے وزیر آباد میں ایک جلسے میں ٹانگ میں گولی لگنے کے بعد گولی کے ٹکڑے نکالنے کے لیے شوکت خانم اسپتال میں سرجری کی گئی ہے ۔سابق وزیراعظم کی ٹانگ کی سرجری ڈیڑھ گھنٹے تک جاری رہی۔ کامیاب آپریشن کے بعد انہیں نجی کمرے میں منتقل کر دیا گیا ہے۔ہسپتال کے ذرائع کے حوالے سے بتایا گیا کہ اگرچہ آپریشن معمولی تھا لیکن عمران خان کی ٹانگ سے ہر ذرہ نکالنے کو یقینی بنانے کے لیے وقت درکار تھا۔پی ٹی آئی سربراہ کا رات کو ہسپتال میں سی ٹی سکین، ایکس رے اور دیگر ٹیسٹ ہوئے جب کہ ڈاکٹر فیصل سلطان کی سربراہی میں ڈاکٹروں کی ٹیم صبح دوبارہ ان کا معائنہ کرے گی۔اس سے قبل فیصل جاوید خان نے ٹوئٹر پیغام میں کہا تھا کہ میری ملاقات عمران خان سے ہوئی جن کی سرجری ہوئی۔ انہوں نے کہا کہ پی ٹی آئی کے سربراہ اللہ کے فضل سے صحت مند ہیں۔سابق وزیراعظم اور پاکستان تحریک انصاف (پی ٹی آئی) کے چیئرمین عمران خان اور پی ٹی آئی کے دیگر رہنما پارٹی کے لانگ مارچ کے دوران اللہ والا چوک میں پی ٹی آئی کے استقبالیہ کیمپ کے قریب فائرنگ کے نتیجے میں زخمی ہوگئے۔حملے کے دوران زخمی ہونے والے پی ٹی آئی رہنما فیصل جاوید خان نے تصدیق کی کہ حملے میں پارٹی کا ایک کارکن یا اہلکار ہلاک اور متعدد زخمی ہوئے۔
