کاٹھمنڈو، 20/اکتوبر: نیپال میں گزشتہ تین دنوں سے جاری بے موسم بارش کے بعد آئے سیلاب اور تودہ گرنے کے واقعات سے کم سے کم 48 لوگوں کی موت ہوگئی اور 31 افراد لاپتا ہوگئے۔ ذرائع کے مطابق موسم برسات دو ہفتے قبل ہی ختم ہوگیا تھا اور اس بے موسم کی بارش سے ندیوں اور آبی ذخائر میں آبی سطح میں اضافہ ہوگیا ہے۔ وزارت داخلہ کے ترجمان فنندر منی پوکھریل نے بتایا کہ 48 افراد کی ہلاکت اور 31 افراد کے لاپتا ہونے کے علاوہ 23 لوگ بدھ تک بارش کے سبب پیش آئے حادثات میں زخمی ہوئے ہیں۔ ان حادثات میں ہوئی ہلاکتوں کی تعداد میں اضافہ سے انکار نہیں کیا جاسکتا۔انہوں نے بتایا کہ ان واقعات میں 20 مکانات پوری طرح تباہ ہوگئے ہیں اور سینکڑوں ایکڑ میں کھڑی دھان کی فصل برباد ہوگئی ہے۔ ملک کے 77 اضلاع میں سے 20ضلعے بری طرح متاثر ہوئے ہیں۔ ابھی تک ہوئے جان ومال کے نقصان کااندازہ نہیں لگایا جاسکا ہے۔وزارت داخلہ کی ایک رپورٹ کے مطابق الام ضلع میں سب سے زیادہ گیارہ افراد کی موت ہوئی ہے۔ مغربی نیپال کے سدور مغرب میں دوتی ضلع میں نو افراد کے ہلاک ہونے کی اطلاع ہے۔ اسی صوبہ کے بجہانگ ضلع میں 23 لوگوں کے لاپتہ ہونے کی اطلاع ہے۔محکمہ موسمیات کے مطابق بارش کے بیشتر واقعات مشرقی اور مغربی حصوں میں پیش آئے ہیں۔ جمعرات سے موسمی بارش میں کمی کے آثار ہیں۔(یو این آئی)
