حیدرآباد:جنوبی افریقہ کے ساتھ کھیلی جانے والی ٹسٹ سیریز سے پہلے ہندوستانی کرکٹ ٹیم کے سابق کپتان سچن تیندولکر نے حیدرآباد کے تیزگیندباز محمد سراج کی ستائش کی جس پر محمد سراج کافی پُرجوش نظرآئے۔سراج نے سچن کی اس ستائش کو کافی ترغیب دلانے والا قرار دیا اوروعدہ کیا کہ وہ ٹیم کے لئے ہمیشہ بہتر مظاہرہ کریں کی کوشش کریں گے۔حیدرآباد کے تیزگیندباز جو ان دنوں جنوبی افریقہ کے ساتھ ٹسٹ سیریز کے لئے جوہانسبرگ میں ہیں،نے کرکٹ کے اس عظیم کھلاڑی کی ستائش کے جواب میں ٹوئیٹ کرتے ہوئے کہا”شکریہ سر۔آپ کی طرف سے مجھ کو کافی ترغیب ملی ہے۔میں ہمیشہ میرے ملک کے لئے بہتر مظاہرہ کروں گا“۔سچن نے سراج کی خصوصیات بیان کرتے ہوئے کہاکہ وہ سراج کو پسند کرتے ہیں،ان کو سراج میں سب سے زیادہ پسند چیز یہ ہے کہ ہر مرتبہ ان کی باڈی لینگویج اورشدت ان میں نظر آتی ہے۔جب وہ گیند کرنے کے لئے دوڑلگاتے ہیں تو یہ سمجھنا مشکل ہوتا ہے کہ یہ کھیل کا پہلا اوور ہے یا دن کاآخری اوور ہے۔سچن نے کہا”ان کے پیروں میں اسپرنگ ہے اوروہی وہ دیکھنا چاہتے ہیں۔ان کا رنراپ توانائی سے بھرپور ہوتا ہے اور ان کا شمار ان گیند بازوں میں ہوتا ہے جنہیں آپ دیکھ کر یہ محسوس نہیں کرسکتے کہ وہ کھیل کا پہلااوورکررہے ہیں یا پھر دن کا آخری اوور۔“سچن نے ایک پروگرام جس کا نام بیک اسٹیج وتھ بوریا ہے میں یہ ستائشی کلمات اداکئے۔انہوں نے سراج کو تیزی کے ساتھ سیکھنے والاکھلاڑی بھی قراردیا۔سچن نے 27سالہ سراج کی جانب سے آسٹریلیا میں دکھائی گئی ذہنی پختگی کی بھی ستائش کی جہاں انہوں نے ملبورن میں کھیلے گئے اپنے پہلے ٹسٹ میں پانچ وکٹس (پہلی اننگز میں دو اور دوسری اننگز میں تین)لئے تھے۔سچن نے کہا ”وہ ایک مناسب بولر ہیں اور مثبت ذہنیت کے حامل ہیں۔وہ تیزی کے ساتھ سیکھنے کی صلاحیت رکھتے ہیں۔جب انہوں نے آسٹریلیا میں گذشتہ سال پہلا ٹسٹ میچ کھیلاتھا ایسا محسوس ہی نہیں ہورہا تھا کہ وہ پہلا میچ کھیل رہے ہیں کیونکہ انہوں نے اپنی ذہنی پختگی کا مظاہرہ کیا تھا۔انہوں نے اپنا اسپیل خوب صورتی کے ساتھ مکمل کیا اور اس کے بعد سے انہوں نے پیچھے نہیں دیکھا۔ہر مرتبہ جب میں ان کو دیکھتا ہوں تو ان میں نئی چیز مجھے نظرآتی ہے۔“ہندوستانی ٹیم میں جسپریت بمرا،محمد سمیع اور ایشانت شرما جیسے بہترین گیندبازوں کے ہونے کے باوجود محمد سراج نے اس ٹیم میں کئی مواقع حاصل کئے۔ان دونوں ٹیموں کے درمیان تین ٹسٹ کی سیزیز ہوگی۔پہلا ٹسٹ 26تا30دسمبر کھیلاجائے گا۔دوسراٹسٹ 3تا7جنوری اور آخری ٹسٹ 11تا15جنوری کھیلاجائے گا۔26دسمبر سے باکسنگ ڈے کے موقع پر پہلا ٹسٹ میچ سینچورین میں کھیلاجائے گا۔
