نئی دہلی:بھارتیہ جنتا پارٹی (بی جے پی) کے صدر جگت پرکاش نڈا نے ہفتہ کے روز کہا کہ سنسکرت زبان اور ثقافت 135 کروڑ ہندوستانیوں کو ایک دھاگے میں پیرونے والی انوکھی طاقت ہے اور بی جے پی کی قیادت والی حکومت اس کے تحفظ اور فروغ کے لئے پرعزم ہے۔مسٹر نڈا نے یہاں امبیڈکر انٹرنیشنل سنٹر میں کیندریہ سنسکرت وشو ودیالیہ کے زیراہتمام منعقد اتکرش مہوتسو کا افتتاح کرتے ہوئے یہ باتیں کہیں۔اتکرش مہوتسو کا اہتمام تین سنسکرت یونیورسٹیوں کیندریہ سنسکرت یونیورسٹی (نئی دہلی)، لال بہادر شاستری راشٹریہ سنسکرت وشو ودیالیہ (نئی دہلی) اور راشٹریہ سنسکرت وشو ودیالیہ (تروپتی) نے مشترکہ طور پر کیا ہے۔ اتکرش مہوتسو کا بنیادی مقصد سنسکرت زبان کو فروغ دینا اوراس کی حوصلہ افزائی کرنا ہے جس کا موضوع ‘نئے تعلیمی دور میں سنسکرت کے مطالعے کا عالمی رجحان ہے۔پروگرام میں سینٹرل سنسکرت یونیورسٹی (نئی دہلی) کے وائس چانسلرپروفیسر سرینواس ورکھیڈی، نالندہ یونیورسٹی (نالندہ) کے چانسلر ڈاکٹر وجے بھاٹکر، نیشنل سنسکرت یونیورسٹی (تروپتی) کے وائس چانسلر پروفیسر۔ رادھاکانت ٹھاکر، لال بہادر شاستری نیشنل سنسکرت یونیورسٹی (نئی دہلی) کے وائس چانسلر پروفیسر مرلی منوہر پاٹھک، اکنامک ایڈوائزری کونسل کے چیئرمین بیبیک ڈیبرائے اور راشٹریہ سنسکرت وشو ودیالیہ (تروپتی) کے رجسٹرار چلاوینکٹیشور بھی موجود تھے۔پروگرام سے خطاب کرتے ہوئے جناب نڈا نے کہا، ’’تعلیم اور ثقافت کو فروغ دینا ہم سب کی ذمہ داری ہے۔ سنسکرت صرف ایک زبان ہی نہیں بلکہ یہ مختلف جہتوں کو آگے بڑھانے کا ایک ذریعہ ہے۔ سنسکرت بھی وہ زبان ہے جو قدیم علم کو محفوظ رکھتی ہے۔ انہوں نے سنسکرت کو آگے لے جانے کے اس عظیم کام کے لیے سب کا شکریہ ادا کیا۔بی جے پی کے صدر نے کہا کہ جہاں سنسکرت ہے وہاں ثقافت ہے اور یہی ہمارا نظریہ بھی ہے۔ ثقافت کے ساتھ ساتھ یہ ترقی کا ذریعہ بھی ہے۔ سنسکرت ہم سب کو اندھیرے سے روشنی کی طرف لے جانے کا ایک ذریعہ ہے۔ سب سے قدیم کتاب رگ وید بھی سنسکرت میں ہے۔ وزیر اعظم نریندر مودی کی قیادت میں مرکزی حکومت اور بی جے پی سنسکرت اور ثقافت کو آگے بڑھانے کے عزم کے ساتھ کام کر رہی ہے۔ ہم ثقافت کو بچا رہے ہیں۔ہماری پارٹی ہندوستان کی قدیم روایت اور عظیم ثقافت کو برقرار رکھنے کے لیے پرعزم ہے۔ مودی حکومت سنسکرت کے فروغ کے لیے کوئی کسر نہیں چھوڑے گی۔ سنسکرت اور ثقافت کے فروغ کے لیے یقیناً یہ بہترین دور ہے۔ ایسا وقت ہمیشہ قائم رہے ، یہ آپ کی اور ہم سب کی ذمہ داری ہے۔انہوں نے کہا کہ کورونا کے دور میں جہاں ایک طرف وزیر اعظم نریندر مودی نے 135 کروڑ ہم وطنوں کو دیسی ویکسین سے تحفظ فراہم کیا وہیں دوسری طرف پردھان منتری غریب کلیان انا یوجنا کے توسط سے 80 کروڑ لوگوں کے لئے دو سال کے لیے دو وقت کی روٹی کا بھی بندوبست کیا ۔ انہوں نے کہا، “صرف یہی نہیں، ویکسین میتری کے تحت، ہم نے دنیا کے تقریباً 100 ممالک کو ویکسین دستیاب کرائی ہے۔مسٹرنڈا نے کہا کہ وزیر اعظم نے کیندریہ سنسکرت یونیورسٹی (نئی دہلی)، لال بہادر شاستری راشٹریہ سنسکرت وشو ودیالیہ (نئی دہلی) اور راشٹریہ سنسکرت وشواودیالیہ (تروپتی)، تینوں سنسکرت یونیورسٹیوں کو مرکزی یونیورسٹیوں کا درجہ دیا جو ان کے عزم کو ظاہر کرتا ہے۔
