نئی دہلی :الیکشن کمیشن نے اتر پردیش، مہاراشٹر، بہار، ہریانہ، راجستھان اور آندھرا پردیش سمیت 15 ریاستوں میں اس سال جون اور اگست کے درمیان خالی ہونے والی راجیہ سبھا کی 57 سیٹوں کے لیے ووٹنگ 10 جون کو کرانے کا فیصلہ کیا ہے الیکشن کمیشن کی جانب سے جمعرات کو جاری شیڈول کے مطابق ان سیٹوں کے لئے نوٹیفکیشن 24 مئی کو جاری کیا جائے گا اور کاغذات نامزدگی 31 مئی تک داخل کئے جا سکیں گے ۔ کاغذات نامزدگی کی جانچ پڑتال یکم جون کو ہو گی اور 3 جون تک نام واپس لیے جا سکیں گے ۔ ان سیٹوں کے لیے ووٹنگ 10 جون کو صبح 09:00 بجے سے شام 4:00 بجے تک کرایا جائے گا اوراسی دن شام 5 بجے سے ووٹوں کی گنتی شروع ہوگی ۔کمیشن نے کہا ہے کہ ووٹنگ کا عمل 13 جون تک مکمل کرلیا جائے گا ۔کمیشن کی پریس ریلیز کے مطابق آندھرا پردیش کی چار، تلنگانہ کی دو، چھتیس گڑھ کی دو، مدھیہ پردیش کی تین، تمل ناڈو کی چھ، کرناٹک کی چار، اڈیشہ کی تین، مہاراشٹر کی چھ ، پنجاب کی دو، راجستھان کی چار، اتر پردیش کی گیارہ، اتراکھنڈ کی ایک، بہار کی پانچ، جھارکھنڈ اور ہریانہ کی دو دو سیٹوں پر ووٹنگ کرائی جائے گئی ۔کمیشن نے آج ہی کرناٹک قانون ساز کونسل کے گریجویٹ حلقہ کی دو سیٹوں اورٹیچرس حلقہ کی دو سیٹوں کے انتخابی شیڈول کا بھی اعلان کیا ۔ یہ چار سیٹیں 4 جولائی کو خالی ہو رہی ہیں۔کمیشن ان چاروں سیٹوں کے لئے انتخابات کا نوٹیفکیشن 19 مئی کو جاری کرے گا اور اس کے لیے کاغذات نامزدگی 26 مئی تک جمع کرائے جاسکیں گے ۔ کاغذات نامزدگی کی جانچ پڑتال 27 مئی تک ہوگی اور کاغذات نامزدگی واپس لینے کی آخری تاریخ 30 مئی ہے۔پریس ریلیز کے مطابق ان سیٹوں پر پولنگ 13 جون کو صبح 8 بجے سے شام 4 بجے تک ہوگی اور ووٹوں کی گنتی 15 جون کو ہوگی۔ الیکشن کمیشن نے کہا کہ ان سیٹوں کے لیے انتخابی عمل 17 مئی تک مکمل کر لیا جائے گا۔
