نئی دہلی: نائب صدر جمہوریہ ایم وینکیا نائیڈو نے ہندوستان اور قطر کے درمیان بہتر ماحول بنانے اور باہمی فائدے کے لئے تعاون بڑھانے کی اپیل کرتے ہوئے دونوں ممالک کے درمیان اقتصادی شراکت داری کو مضبوط بنانے پر زور دیا ہے۔گبون، سینیگال اور قطر کے اپنے تین ملکوں کے دورے کے آخری مرحلے میں دوحہ پہنچے مسٹر نائیڈو نے ہندوستان-قطر تعلقات کی مضبوطی کا ذکر کیا اور کہا کہ دونوں ممالک کے درمیان ایک خاص رشتہ ہے جو صدیوں میں پروان چڑھا ہے۔ انہوں نے مضبوط شراکت داری کو مزید خوشحال کرنے اور کاروبار میں تنوع کو مزید فروغ دینے پر زور دیا۔کل دوحہ میں انڈیا-قطر بزنس فورم کی میٹنگ سے خطاب کرتے ہوئے مسٹر نائیڈو نے کہا کہ ترقی کا مرکز مغرب سے ایشیا کے خطے میں منتقل ہو گیا ہے اور ہندوستان ایک مرکز کے طور پر ابھرا ہے۔ حکومت کاروبار کرنے میں آسانی کو بہتر بنا رہی ہے۔ اس موقع پر انہوں نے ‘انڈیا-قطر اسٹارٹ اپ برج’ کا آغاز کیا جس کا مقصد دونوں ممالک کے اسٹارٹ اپ ماحولیاتی نظام کو جوڑنا ہے۔ انہوں نے کہا کہ ہندوستان اختراعی ماحول کو فروغ دے رہا ہے۔نائب صدر جمہوریہ نے کہا کہ ہندوستان ماحولیات کے تحفظ اور موسمیاتی تبدیلی سے نمٹنے کے لیے مسلسل کوششیں کر رہا ہے۔ انہوں نے قطر کو اپنی توانائی کی حفاظت میں ہندوستان کا بھروسہ مند پارٹنر بننے اور آئی ایس اے میں شمولیت اختیار کرنے کی دعوت دی۔بعد ازاں دن میں مسٹر نائیڈو نے قطر کی شوریٰ کونسل کے چیئرمین حسن عبداللہ الغنیم سے ملاقات کی۔ شوریٰ کونسل ریاست قطر کا قانون ساز ادارہ ہے جس کے 45 ارکان ہیں۔ مسٹر نائیڈو نے ہندوستانی اور قطری پارلیمنٹ کے درمیان تعلقات کو گہرا کرنے اور پارلیمانی تبادلوں کو فروغ دینے کی اپیل کی۔ راجیہ سبھا کے چیئرمین کی حیثیت سے مسٹر نائیڈو نے اسپیکر اور شوریٰ پریشد کے ارکان کو ہندوستان کے دورے کی دعوت دی۔اس دورے پر مسٹر نائیڈو کے ساتھ صحت اور خاندانی بہبود کے وزیر مملکت ڈاکٹر بھارتی پراوین پوار، اراکین پارلیمنٹ سشیل کمار مودی، وجے پال سنگھ تومر اور پی رابندر ناتھ بھی ہیں۔