واشنگٹن / ریو ڈی جنیرو / نئی دہلی : دنیا بھر میں مہلک ترین اور ہلاکت خیزعالمی وبا کورونا وائرس(کووڈ ۔19) سے متاثرہونے والے لوگوں کی تعداد بڑھ کر 18.77 کروڑ اوراب تک اس موذی وبا سے 40.48 لاکھ سے زیادہ افراد لقمہ اجل بن چکے ہیں ۔ دریں اثنا ، اب تک پوری دنیا میں 349.47 کروڑ سے زیادہ افراد کو کورونا وائرس کے ٹیکے لگائے جاچکے ہیں۔امریکہ کی جان ہاپکنز یونیورسٹی کے سائنس اینڈ انجینئرنگ سینٹر (سی ایس ایس ای) کے جاری کردہ تازہ ترین اعدادوشمار کے مطابق دنیا کے 192 ممالک اور خطوں میں کورونا وائرس کے متاثرین کی تعداد 18 کروڑ 77 لاکھ 42 ہزار 713 جبکہ ہلاک شدگان کی تعداد 40 لاکھ 48 ہزار 18 موذی وبا کی وجہ سے اپنی زندگیوں سے ہاتھ دھو بیٹھے ہیں۔ امریکہ میں کورونا وائرس کی رفتار قدرے سست پڑ گئی ہے، تاہم یہاں متاثرین کی تعداد 3.39 کروڑ سے تجاوز کرچکی ہے اور 6.07 لاکھ سے زیادہ افراد ہلاک ہوچکے ہیں۔
