دبئی ، : پاکستانی بیٹسمین فواد عالم اور فاسٹ بالر شاہین آفریدی نے کنگسٹن میں ویسٹ انڈیز کے خلاف دوسرے ٹیسٹ کے دوران اپنی شاندار پرکارکردگی کے بعد آئی سی سی کی جانب سے بدھ کو جاری مردوں کی ٹیسٹ رینکنگ میں چھلانگ لگا ئی ہے۔ دونوں اپنے کیریئر کے بہترین مقام پر پہنچ گئے ہیں۔عالم جہاں پہلی اننگز میں 124 رنز کی بدولت 34 درجے چھلانگ لگا کر بلے بازوں کی فہرست میں 21 ویں نمبر پر ، جبکہ شاہین میچ میں اپنی 10 وکٹیں حاصل کرنے کی کارکردگی بدولت ں 10 درجے ترقی کے ساتھ آٹھویں نمبر پر آگئے ہیں۔ عالم اور شاہین کے علاوہ دیگر کھلاڑیوں کی شاندار کارکردگی کی بدولت پاکستان نے دوسرے ٹیسٹ میں ویسٹ انڈیز کو 109 سے شکست دے کر سیریز 1-1 سے ختم کی ۔پچھلے سال اگست میں ٹیسٹ کرکٹ میں واپسی کے بعد سے چار سنچریاں بنانے والے عالم رواں سال مئی میں 47 ویں نمبر پر جبکہ شاہین اس ٹیسٹ سے پہلے 18 ویں نمبر پر تھے ، جو ان کے کیریئر کی بہترین رینکنگ تھی۔آئی سی سی کے مطابق پاکستان کے کپتان بابر اعظم اور بلے باز محمد رضوان کو بھی رینکنگ میں فائدہ ہوا ہے۔ بابر جہاں دونوں اننگز میں 75 اور 33 رنز کی بدولت ایک مقام کے فائدے سے بیٹنگ رینکنگ میں ساتویں نمبر پر ، جبکہ رضوان 31 اور 10 کی ناٹ آؤٹ اننگز کے ساتھ ٹاپ 20 میں واپس آگئے ہیں۔ دریں اثنا ، بائیں ہاتھ کے اسپنر نعمان علی دوسری اننگز میں تین وکٹوں کے ساتھ 48 ویں سے 44 ویں نمبر پر آگئے ہیں۔ویسٹ انڈیز کے اسٹار آل راؤنڈر جیسن ہولڈر کو بھی رینکنگ میں فائدہ ہوا ہے۔ وہ دونوں اننگز میں بالترتیب 26 اور 47 رنز بنانے کی بدولت وہ چھ مقام کے فائدے سے بیٹنگ رینکنگ میں 37 ویں نمبر پر آگئے ہیں۔ وہیں سیریز میں 11 وکٹیں لینے والے ونڈیز کے تیز گیند باز جیڈن سیلز نے چار درجے ترقی کر کے 54 ویں پوزیشن حاصل کی ہے۔ (یو این آئی)
