لندن: تیزگیندباز کرس ووکس نے 2 ستمبر کو اوول میں ہندوستان کے خلاف چوتھے ٹیسٹ کے لیے انگلینڈ کی ٹیم میں واپسی کی ہے۔ووکس کے علاوہ وکٹ کیپر بلے باز سیم بلنگز کو بھی 15 رکنی ٹیم میں شامل کیا گیا ہے۔ وہ جوس بٹلر کی جگہ لیں گے جو اپنے دوسرے بچے کی پیدائش کی وجہ سے چوتھے ٹیسٹ کے لیے دستیاب نہیں ہوں گے۔ ووکس نے ای سی بی کی ریسٹ اینڈ روٹیشن پالیسی اور اپنی ایڑی کی چوٹ کی وجہ سے 12 مہینے سے سے زائد عرصے تک ٹیسٹ کرکٹ نہیں کھیلا ہے۔ وہ چوٹ کی وجہ سے ہندستان کے خلاف جاری ٹیسٹ سیریز کے پہلے تین میچوں سے بھی باہر تھے ، حالانکہ وہ اب موجود ہیں اور گزشتہ ہفتے وارکشائر کی دوسری پلیئنگ الیون کے ساتھ ساتھ جمعہ کو ٹی 20 بلاسٹ ٹورنامنٹ کے کوارٹر فائنل میں کھیلے تھے۔انگلینڈ کے ہیڈ کوچ کرس سلور ووڈ نے ایک بیان میں کہا ، "یہ بہت خوشی کی بات ہے کہ کرس ووکس ٹیسٹ ٹیم میں واپس آرہے ہیں۔ انہوں نے بغیر کسی چوٹ کے خدشات کے گزشتہ ہفتے وارکشائر کے ساتھ اچھی بولنگ کی ہے۔ وہ اہم کھلاڑی ہیں۔ ہم انہیں اوول میں تیاری کرتے ہوئے دیکھنے کے لئے پرجوش ہیں کیونکہ ہم بیک ٹو بیک ٹیسٹ کھیل رہے ہیں۔سلور ووڈ نے تصدیق کی ہے کہ بٹلر کی غیر موجودگی میں جانی بیئرسٹو اوول میں وکٹ کیپنگ کریں گے ، حالانکہ انگلینڈ نے وکٹ کیپر بلے باز بلنگز کو بھی ٹیم میں شامل کیا ہے ، جنہوں نے ابھی ٹیسٹ میں ڈیبیو نہیں کیا۔ کسی کھلاڑی کی چوٹ یا بیماری کی صورت میں انہیں بیک اپ پلیئر کے طور پر ٹیم میں شامل کیا گیا ہے۔ تاہم یہ ابھی تک واضح نہیں ہے کہ بٹلر جمعرات 10 ستمبر سے ایمریٹس اولڈ ٹریفورڈ میں شروع ہونے والے آخری ٹیسٹ کے لیے ٹیم میں واپسی کریں گے یا نہیں۔ (یو این آئی)
