سینٹ پیٹرزبرگ: فیفا ورلڈ کپ فاتح اسپین کی نیشنل فٹبال ٹیم نے آج یہاں پہلے دلچسپ کوارٹر فائنل میں سوئزرلینڈ کو پنالٹی شوٹ آوٹ میں 3-1سے شکست دے کر یو اے ایف اے یورو کے سیمی فائنل میں داخلہ حاصل کرلیا ہے ۔ اسپین اب 7جولائی کو پہلے سیمی فائنل میں چار بار کے عالمی فاتح اٹلی سے مقابلہ کرے گا۔ اسپین اور سوئزر لینڈ کے درمیان کانٹے کا میچ ہوا، جس کی وجہ سے فل ٹائم میں اسکور 1-1رہا اور کوئی نتیجہ نہیں نکلا۔ اس کے بعد ہوئے پنالٹی شوٹ آوٹ میں سوئزرلینڈ محض ایک گول کرسکا، جبکہ اسپین نے تین گول داغ کر میچ جیتنے کے ساتھ سیمی فائنل میں داخلہ حاصل کرلیا۔ سوئزرلینڈ نے حالانکہ پنالٹی شوٹ آوٹ میں میچ گنوانے سے پہلے اسپین سے سخت مقابلہ کیا۔ اسپین کی مضبوط ٹیم کو سوئزرلینڈ کے گول کیپر یام سومر کے سامنے جدوجہد کرنی پڑی۔ اسپین نے میچ کے دوران گول کرنے کے 28مواقع بنائے لیکن ہر بار یون سومر گول روکنے میں کامیاب رہے ۔ اسپین کی ٹیم فاضل وقت میں بھی گول کرنے میں کامیاب نہیں رہی تھی۔ اسپین کے نام ایک گول میچ کے آٹھویں منٹ میں اسکور ہوا اور وہ بھی سوئزرلینڈ کی غلطی کی وجہ سے ۔ دراصل مڈ فیلڈر ڈینس جکاریا کے اپنے ہی پوسٹ میں گول کردینے سے اسپین کو 1-0کی سبقت مل گئی تھی حالانکہ سوئزر لینڈ دوسرے ہاف میں واپسی کرنے میں کامیاب رہا۔ 68ویں منٹ میں شاکیری نے گول داغ کرٹیم کو 1-1سے برابری پر لایا۔ فاضل وقت میں اسپین گول نہیں کرسکا جس کے بعد پنالٹی شوٹ آوٹ ہوا جس میں سوئزرلینڈ کے کھلاڑیوں نے مایوس کیا۔ گول کیپر یان سومر نے پورے میچ اور پنالٹیز میں اپنے شاندار ڈیفنس سے ٹیم کو باوقار یوروپی ٹورنمنٹ میں برقرار رکھا لیکن سوئزر لینڈ کے کھلاڑی پنالٹی شوٹ آوٹ میں محض ایک موقع سے ہی فائدہ اٹھا سکے ۔
