نئی دلی:شمال مشرقی علاقہ اور سکم میں قومی شاہراہ پروجیکٹوں کے اپنے 3 روزہ جائزہ پروگرام کے پہلے دن مرکزی وزیر برائے روڈ ٹرانسپورٹ اور قومی شاہراہ جناب نتن گڈکری نے آسام، میگھالیہ، سکم اور ناگالینڈ میں این ایچ پروجیکٹوں کی پیش رفت کا آسام کے وزیر اعلیٰ جناب ہمنت بسوا سرما، مرکزی وزیر مملکت جنرل وی سنگھ کے کے ساتھ جائزہ لیا۔ جائزہ اجلاس میں حصول اراضی کے مسائل، جاری پروجیکٹوں کی پیشرفت، مجوزہ پروجیکٹس، نئی ٹیکنالوجی کے استعمال، تنازعات اور ثالثی اور ممکنہ مالی مداخلتوں سے متعلق بات چیت کی گئی۔ جناب گڈکری نے مختلف پروجیکٹوں میں ہورہی تاخیر کا بھی جائزہ لیا۔ 4 ریاستوں میں پروجیکٹوں میں تاخیر کی وجوہات کو سمجھنے اور انہیں ٹریک پر لانے کے لیے مخصوص ہدایات جاری کیں۔ جناب گڈکری نے تمام عہدیداروں کو پروجیکٹوں کی جلد تکمیل کی ہدایت دی۔ انہوں نے شمال مشرقی ریاستوں میں اعلیٰ درجے کے ٹرانسپورٹ انفراسٹرکچر کو تیار کرنے کے لیے مرکزی اور ریاستی ایجنسیوں کے درمیان تال میل اور شراکت داری کی اہمیت پر زور دیا۔
