کولمبو: پہلی مرتبہ بین الاقوامی سطح پر ہندوستانی ٹیم کی نمائندگی کرنے والے تین کھلاڑی دیودت پڈیکل، نتیش رانا اور چیتن سکریا دورہ سری لنکا پر ہندوستانی ٹیم کے سابق کپتان اور موجودہ کوچ راہول ڈراویڈ کے تجربہ سے سیکھنے کے لیے پرعزم ہیں۔ 18 جولائی سے سری لنکا کا دورہ شروع ہورہا ہے اور اس دورے پر ہندوستانی ٹیم میں تقریباً 6 ا یسے کھلاڑی ہیں جو پہلی مرتبہ بین الاقوامی سطح پر ہندوستان کی نمائندگی کریں گے۔ چوں کہ ویراٹ کوہلی کی زیر قیادت ہندوستانی ٹیم انگلینڈ کے دورے پر ہیں لہٰذا ڈراویڈ کو کوچ اور شکھر دھون کو ٹیم کا کپتان بناکر سری لنکا کے دورے کے لیے ایک اور اسکواڈ کا انتخاب کیا گیا ہے جو دراصل کورونا کے بحران اور سفری پابندیوں کے ساتھ طویل ایام کا قرنطینہ ہے۔ دیودت پڈیکل نے اسٹار اسپورٹس سے اظہار خیال کرتے ہوئے کہا کہ چوں کہ میں اور ڈراویڈ ایک ہی اسکول کے طالب علم ہیں اور میں ان سے ہمارے اسپورٹس ڈے کے ایونٹ پر ملاقات کی تھی۔ اس موقع پر میں نے ڈراویڈ کو گلدستہ دیا تھا اور پہلی مرتبہ ان سے میری اسی موقع پر گفتگو ہوئی تھی۔ پڈیکل نے ڈراویڈ کے انکساری کا بھی تذکرہ کیا اور کہا کہ اب وہ ہمارے کوچ کی حیثیت سے ٹیم میں موجود ہیں اور ان سے اظہار خیال کرنا ایک بہتر احساس ہے۔ نتیش رانا نے کہا کہ ڈراویڈ کی سرپرستی میں میں صدفیصد مظاہرہ کرنے کے لیے تیار ہوں اور ان سے میں صبرآزما اننگز کے گر سیکھوں گا۔ سوراشٹرا سے تعلق رکھنے والے فاسٹ بولر چیتک سکریا نے کہا ہے کہ میں ڈراویڈ سے وہ گر سیکھنا چاہتا ہوں جنہوں نے انگلینڈ اور آسٹریلیا کے خلاف ان ٹیموں کے بہتر وقت میں سیکھا تھا۔ انہوںنے مزید کہا کہ میں ڈراویڈ سے یہ بھی سیکھنا چاہتا ہوں کہ حریف ٹیم کو کیسے پریشان کیا جائے۔ واضح رہے کہ ہندوستان اور سری لنکا کے درمیان تین وانڈے اور تین ٹی 20 مقابلے کی سیریز کھیلی جائے گی جس کا آغاز 18 جولائی کو ہوگا۔