نئی دہلی:ریپبلکن پارٹی آف انڈیا کے صدر اور سماجی انصاف و تفویض اختیارات کے وزیر مملکت رام داس اٹھاولے نے ہفتہ کے روز کہا کہ مسٹر غلام نبی آزاد کو طویل عرصے کے بعد آزادی ملی ہے، اب انہيں ملک کی ترقی کے لیے نیشنل ڈیموکریٹک الائنس (این ڈی اے) میں شامل ہونا چاہئے۔مسٹر اٹھاولے نے کہا کہ مسٹرغلام نبی آزاد کو کانگریس پارٹی میں وہ عزت نہیں مل رہی تھی جس کے وہ حقدار تھے اور وہ آئے دن الزامات اور جوابی الزامات کا سامنا کر رہے تھے۔ مسٹر آزاد کا کانگریس پارٹی سے استعفیٰ دینا یقیناً ایک خوش آئند قدم ہے۔ مسٹر اٹھاولے نے کہا، "جب غلام نبی آزاد کی راجیہ سبھا میں میعاد ختم ہوئی تو میں نے انہیں مشورہ دیا تھا کہ آپ کو اب کانگریس کے ساتھ نہیں رہنا چاہئے اور این ڈی اے میں شامل ہونا چاہئے۔”
مسٹر اٹھاولے نے کہا کہ جب مسٹر آزاد کو راجیہ سبھا سے الوداع کہا گیا، تو وزیر اعظم نریندر مودی نے ایوان میں ان کی تعریف کی تھی اور اس دوران وزیر اعظم نے کہا تھا کہ اقتدار اور منصب زندگی میں آتا جاتا رہتا ہے، لیکن اسے کیسے سنبھالیں؟ یہ مسٹر غلام نبی آزاد سے سیکھنا چاہیے۔انہوں نے کہا کہ اگر ہم کانگریس پارٹی کی موجودہ حالت کو دیکھیں تو کانگریس مسلسل ٹوٹ رہی ہے۔ مسٹر شرد پوار، محترمہ ممتا بنرجی کے بعد مسٹر غلام نبی آزاد کی رخصتی کانگریس پارٹی میں بڑی پھوٹ کا سبب بن سکتی ہے۔ انہوں نے کہا کہ ملک اور سماج کی ترقی کے لئے مسٹر آزاد کو این ڈی اے سے وابستہ ہونا چاہئے۔ (یو این آئی)
