بی ایچ یو طلبا نے علمی معیشت میں نمایاں حصہ ادا کیا ہے: لیفٹیننٹ گورنر منوج سنہا
کشمیر انفو//
سری نگر/08 ؍جولائی:لیفٹیننٹ گورنر منوج سِنہا نے سنیچروار کو سری نگر میں بنارس ہندو یونیورسٹی ۔ بی ایچ یو یورولوجی کے ایلومنی طالب علموں کے اِجلاس سے خطاب کیا جس کا اِنعقاد یورولوجی ڈیپارٹمنٹ سکمز نے کیا تھا۔اِس موقعہ پر لیفٹیننٹ گورنر نے اَپنے خطاب میں علمی معیشت میں بی ایچ یو کے سابق طلباء کی اہم شراکت اور ملک کی ہمہ جہت ترقی کے لئے تحقیق کے نئے شعبوں کو آگے بڑھانے کی ستائش کی۔اُنہوں نے مہامنا پنڈت مدن موہن مالویہ کو خراجِ عقیدت پیش کیا اور ان کی زندگی بھر کی مہمات کو یاد کیا جنہوں نے ہندوستانی سماج میں سماجی و اقتصادی تبدیل لائی ہے۔لیفٹیننٹ گورنر نے کہا،’’ مہامنا پنڈت مد ن موہن مالویہ نے ہندوستان کے صنعتی اِنقلاب کی سکرپٹ لکھی تھی ۔اب ملک سماجی و اقتصادی ترقی کے اہم شعبوں میں ایلومنی طلباء کے قابل قدر شراکت کی توقع کرتا ہے اور تیزی سے بدلتے ہوئے عالمی ماحول میں ہمیں مقامی صلاحیتوں کو فروغ دینے پر توجہ مرکوز کرنی ہوگی۔‘‘اُنہوں نے کہا ،’’ ایلومنی طلباء کی ذمہ داری ہے کہ وہ نوجوانوں کی رہنمائی کریں ، نئے ہندوستان کے خوابوں اور عزائم کو پورا کرنے کے لئے اَپنی موجودہ صلاحیت کو بروئے کار لانے کے لئے مضبوط نیٹ ورک تیار کریں۔‘‘لیفٹیننٹ گورنر نے کہا کہ تمام سابق طلباء کو آج کی نوجوان نسل کو کل کے چیلنجوں کے لئے تیار کرنے کے لئے اِصلاحات ، بنیادی ڈھانچے کی ترقی اور مضبوط تعلیمی اِداروں کی تعمیر میں اَپنا حصہ اَدا کرنے کا عہد کرنے کی ضرورت ہے۔لیفٹیننٹ گورنر نے جموںوکشمیر کے صحت و طبی تعلیمی شعبے میں حاصل کئے گئے کئی سنگ میلوں پر روشنی ڈالی۔اُنہوں نے مزید کہا کہ وزیر اعظم نریندر مودی جی کی رہنمائی میں ہم صحت کے بنیادی ڈھانچے کو بڑھانے اور سب کے لئے قابل رسائل ، سستی اور معیاری صحت خدمات کو یقینی بنانے کے لئے مخلصانہ کوششیں کر رہے ہیں۔لیفٹیننٹ گورنر نے بی ایچ یو کے طلباء پر زور دیا کہ وہ جموںوکشمیر یوٹی کے صحت خدمات کے ماحولیاتی نظام کو مضبوط بنانے کے لئے فعال شرکت ادا کریں۔اِس موقعہ پر لیفٹیننٹ گورنر نے بی ایچ یو کے طلباء کے اجلاس کا سووینئر اور میڈ یکوز اور این اِی اِی ٹی ایم سی ایچ اِمتحان پر اشاعتوں کو جاری کیا۔اِس موقعہ پر چیئرمین جے اینڈ کے وقف بورڈ ڈاکٹر درخشاں اَندرابی ، سیکرٹری صحت و طبی تعلیم بھوپندر کمار ، ڈائریکٹر سکمز پروفیسر پرویز کول ، بی ایچ یو اور جی ایم سی شعبہ جات کے سربراہ ، سابق سربراہان ، بی ایچ یو کے سابق طلباء اور ان کے اہل خانہ موجو دتھے۔
