دہرادون ، 28 جولائی: اترکھنڈ کے میدانی اور پہاڑیوں علاقوں میں کل رات سے موسلا دھار بارش کی وجہ سے معمولات زندگی درہم برہم ہوگئی ہے۔ متعدد مقامات پر درختوں اور پلوں کے گرنے اور سڑکوں کے دھنسنے کے باعث متعدد مقامات پر ٹریفک بھی رک گیا ہے۔ذرائع نے بدھ کے روز یہاں بتایا کہ ضلع الموڑہ کے ناگاڑ میں جاری بارش کی وجہ سے ایک اسکوٹی سوارکے کیچڑ میں بہہ جانے کی اطلاع ہے۔دہرادون شہر کے ڈووالوالہ تا بکرالوالہ علاقہ کے مابین نالے پر پلیا کے گرجانے سے خوف و ہراس پھیل گیا ہے۔ انڈین ملٹری اکیڈمی (آئی ایم اے) کے قریب درختوں کے گرنے کے سبب ہماچل پردیش اور پنجاب قومی شاہراہ بھی متاثر ہے۔وقفے وقفے سے بارش کی وجہ سے بدری ناتھ ، کیدارناتھ ، یمنوتری نیشنل ہائی ویز بھی ملبے کی زد میں آگئے ہیں، جس کی وجہ سے وہاں ٹریفک بھی درہم برہم ہے۔ اس کے علاوہ ریا سٹ بھر میں سڑکوں کے دھنسنے اور درختوں کے جڑ سے اکھڑ جانے کے سبب 50 سے زائد راستوں پر ٹریفک بند ہے۔محکمہ موسمیات کے مطابق آئندہ دو دن تک اترکشی ، دہرادون ، ٹہری ، پوڑی ، نینی تال ، باگیشور اور پتوڑہ گڑھ اضلاع میں کچھ مقامات پر بہت تیز بارش ہوسکتی ہے۔ (یو این آئی)
