سرینگر:پانچ روز ہ طویل تلاشی آپریشن کے بعد جنوبی قصبہ ترا ل کے جنگلات میں سیکورٹی فورسز اور جنگجوئوں کے مابین خونین معرکہ آرائی میں عسکری تنظیم جیش محمد کا انتہائی مطلوب ترین پاکستانی کمانڈر سمیت دو جنگجو جاں بحق ہو گئے ۔پولیس نے دو جنگجوئوں کی ہلاکت کی تصدیق کرتے ہوئے بتایا کہ جنگلات میں تلاشی آپریشن جاری ہے ۔ ادھر آئی جی پی کشمیر نے پاکستانی جنگجو کی ہلاکت کی تصدیق کرتے ہوئے بتایا کہ مہلوک کمانڈر مسعود اظہر کا قریبی رشتہ دار تھا اور لیتہ پورہ حملے میں ملوث تھا ۔ انہوں نے کامیاب آپریشن کیلئے فورسز کو مبارک باد دی ۔ادھر فوج کا کہنا تھا کہ مہلوک جنگجوئوں سے M-4رائفل اور گلوک پستول بر آمد کر لیا گیا ہے ۔ سی این آئی کو دفاعی ذرائع سے معلوم ہوا ہے کہ ترال کے ناگہ بیرن تارسر نامی جنگلی علاقے میں مسلح جنگجوئوں کی موجودگی کی اطلاع ملنے کے بعد فوج ، سی آر پی ایف اور جموں کشمیر پولیس نے مشتر کہ طورسنیچروار کی صبح جنگلات کا محاصرہ کیا اور وہاں تلاشی آپریشن شروع کر دیا گیا۔ ذرائع سے معلوم ہوا ہے کہ جونہی سیکورٹی فورسز نے جنگلات میں تلاشی آپریشن شروع کر دیا گیا تو وہاںگنے جنگلات میں چھپے بیٹھے جنگجوئوں نے فرار ہونے کی کوشش میں فورسز پر فائرنگ کی جس کے ساتھ ہی جنگلات میں دو بددو جھڑپ شروع ہوئی۔ ذرائع کے مطابق اسی دوران فورسز کی اضافی کمک علاقے کی جانب روانہ کی گئی جنہوں نے پورے جنگلات کو سیل کر دیا اور جنگجوئوںکے فرار ہونے کے تمام راستے سیل کر دئے گئے۔ذرائع کے مطابق ابتدائی جھڑپ کے ساتھ ہی علاقے میں شدید گولیوں کا تبادلہ ہواور علاقے کو مکمل طور پر سیل کیا گیا تاکہ جنگجو ئوں کو فرار ہونے کا موقعہ نہ ملا۔فائرنگ کے ساتھ ہی تمام راستوں کو سیل کر دیا گیا اور محصور جنگجوئوںکے خلاف آپریشن شروع کر دیا گیا۔ ذرائع نے بتایا کہ جنگلات میںکئی گھنٹوں تک جاری فائرنگ کے تبادلے کے بعد جونہی خاموشی چھا گئی تو جنگلات سے تلاشی آپریشن کے دوران دو جنگجو ئوں کی نعشیں بر آمد کر لی گئی اور ان کے قبضے سے اسلحہ و گولہ بارود بھی ضبط کر لیا گیا ۔ پولیس نے جھڑپ میں دو جنگجوئوںکی ہلاکت کی تصدیق کرتے ہوئے بتایا کہ مہلوک جنگجو میںایک انتہائی مطلوب ترین پاکستانی جنگجو تھا ۔ پولیس ترجمان کے مطابق جنوبی ضلع پلوامہ کے ناگہ بیرن-تارسر جنگلی علاقے میں سیکورٹی فورسز کے ساتھ فائرنگ کے تبادلے میں جیش محمد کے ایک مطلوب ترین پاکستانی جنگجو سمیت دوجنگجو ہلاک ہوگئے۔پولیس کے مطابق داچھی گام جنگلی سلسلے کے تارسر مارسر علاقے میں فورسز کی تلاشی آپریشن کے دوران دو جنگجو جاں بحق ہوگئے۔ادھر آئی جی پی کشمیر وجے کمار نے بھی جھڑپ میں دو جنگجوئوںکی ہلاکت کی تصدیق کرتے ہوئے بتایا کہ جھڑپ میں لیتہ پورہ حملے میںملوث انتہائی مطلوب ترین جنگجو جس کی شناخت محمد اسماعیل علوی عرف لمبو عرف عدنان کے بطور ہوئی ہلاک ہو گیا ۔ انہوں نے کہا کہ وہ پاکستان کا شہری تھا،وہ مسعود اظہر کے خاندان سے تھا اور اس کا تعلق جیش محمد سے تھا۔ آئی جی کے مطابق لمبو جیش کے مطلوب ترین کمانڈروں میں شامل تھا۔آئی جی کشمیرنے لمبو سمیت دو جنگجوئوں کو جاں بحق کرنے کیلئے اونتی پورہ پولیس اور فوج کو ’مبارکباد‘ دی۔انہوں نے مزید کہا کہ دوسرے جاں بحق جنگجو کی شناخت کی جارہی ہے۔