نگران نیوز
سری نگر//جمعرات کو بعددوپہر آسمان پر بادلوںکا جمائو گہراہونے کے بعد بانڈی پورہ سمیت شمالی کشمیرکے کئی علاقوںمیں بارش اورتیز ژالہ باری ہوئی جبکہ سہ پہرکے وقت سری نگرسمیت کئی علاقوںمیں تیز ہوائیں چلنے کیساتھ ساتھ گرج چمک کیساتھ بارش بھی شروع ہوگئی اورآسما ن پر بادل بھی گرجنے لگے ۔اس دوران موسمیاتی ماہرین نے خبردار کیاکہ کچھ مقامات پر، خاص طور پر شدید گرج چمک کے طوفان کے ساتھ، تیز ہواؤں اورژالہ باری کا بھی امکان ہے۔ موسمیاتی ماہرین کی پیش گوئی کہ 8سے10اکتوبر کے دوران جموں و کشمیر کے بالائی علاقوں میں ہلکی بارش اور برفباری کا امکان ہے،جمعرات کو بعددوپہر شمالی کشمیر کے بعض علاقوں بشمول بانڈی پورہ میںژالہ باری کی اطلاعات بھی موصول ہوئی ہیں۔ماہرین نے کہاکہ آئندہ 10 گھنٹوں کے دوران کشمیر کے کئی حصوں اور جموں کے کچھ علاقوں میں گرج چمک کے ساتھ بارش کا امکان ہے۔، علاقائی موسمیاتی مرکز سری نگر کے ڈائریکٹر ڈاکٹر مختار احمد نے کہا کہ 8 سے 10 اکتوبر کے دوران جموں و کشمیر میں موسم جزوی طور پر یا مجموعی طور پر ابر آلود رہنے اور کہیں کہیں ہلکی بارش کا امکان ہے، جبکہ بالائی علاقوں میں ہلکی برفباری متوقع ہے۔انہوںنے بتایاکہ 9 اکتوبر کو موسم مجموعی طور پر خشک رہنے کی توقع ہے، البتہ شام کے وقت کچھ مقامات پر ہلکی بارش کا مختصر سلسلہ ہو سکتا ہے۔ڈاکٹر مختار احمد نے کہا کہ 11سے13اکتوبر تک موسم مجموعی طور پر خشک رہنے کی توقع ہے، تاہم 13 اکتوبر کی شام یا رات کے وقت بارش کا مختصر سلسلہ متوقع ہے۔انہوںنے مزیدکہاکہ 14اور 15 اکتوبر کو کئی مقامات پر موسم مجموعی طور پر ابر آلود رہنے اور ہلکی بارش کے ساتھ ساتھ بالائی علاقوں میں ہلکی برفباری کا امکان ہے؛ اس دوران گرج چمک اور تیز ہوائیں چلنے کا بھی امکان ہے۔پیش گوئی کے مطابق، 16 سے18 اکتوبر تک موسم مجموعی طور پر خشک رہنے کا امکان ہے۔ موسمیاتی ماہرین نے لوگوں کو مشورہ دیا ہے کہ وہ فصل کی کٹائی کا عمل جاری رکھیں اور متوقع موسمی حالات کے پیش نظر کٹی ہوئی سیب اور دھان کی فصل کو محفوظ طریقے سے ذخیرہ کرنے کو یقینی بنائیں۔ادھر جمعرات کی شام بانڈی پورہ اور گاندربل کے قریب 30دیہات میں ژالہ باری نے قہر بپا کردیا۔ 10منٹ سے زیادہ وقت تک اولے پڑے جو زمین پر جمع ہوئے جیسے برفباری ہوئی تھی۔
