لکھنؤ ، 17 ستمبر: گڈز اینڈ سروسز ٹیکس (جی ایس ٹی) کونسل نے کورونا کے علاج میں مفید ادویات پر دی گئی جی ایس ٹی چھوٹ کی مدت اور 31 دسمبر تک بڑھانے کے ساتھ ہی کینسر کی کچھ ادویات اور بہت سی دیگر مصنوعات اور اشیاء پر جی ایس ٹی کی شرحوں میں کچھ تبدیلی کی ہے ۔کورونا کی وجہ سے 18 ماہ کے بعد پہلی بار منعقد ہوئی جی ایس ٹی کی 45 ویں میٹنگ میں یہ فیصلے لیے گئے ۔ مرکزی وزیر خزانہ نرملا سیتارمن کی صدارت میں ہونے والی اس میٹنگ میں گجرات کے علاوہ تمام ریاستوں اور مرکز کے زیر انتظام علاقوں کے وزرائے خزانہ کے ساتھ وزارت خزانہ کے سینئر عہدیدار بھی موجود تھے۔ مرکزی وزیر مملکت برائے خزانہ پنکج چودھری نے بھی شرکت کی۔کووڈ 19 وبا کے بعد یہ آمنے سامنے بیٹھ کر ہوئی یہ کونسل کی پہلی میٹنگ تھی ۔ اس طرح کی آخری میٹنگ 20 ماہ قبل 18 دسمبر 2019 کو ہوئی تھی ۔ اس کے بعد کونسل کی میٹنگ ویڈیو کانفرنس کے ذریعے منعقد کی جا رہی تھی ۔ کونسل کی میٹنگ پہلی بار لکھنؤ میں منعقد کی گئی ۔میٹنگ کے بعد محترمہ سیتارمن نے نامہ نگاروں کو بتایا کہ کورونا کے علاج میں مفیدادویات پر دی گئی جی ایس ٹی چھوٹ کی مدت 31 دسمبر 2021 تک بڑھا دی گئی ہے۔ اس کے ساتھ کونسل نے کئی اور ادویات کو اپنے دائرہ کار میں لانے کا فیصلہ کیا ہے اور کچھ ادویات پر جی ایس ٹی کو 12 فیصد سے کم کر کے پانچ فیصد کر دیا گیا ہے۔ (یو این آئی)
