نئی دہلی ، 13 اکتوبر: سابق وزیر اعظم ڈاکٹر منموہن سنگھ کی طبیعت بگڑنے کے بعد انہیں بدھ کی شام نئی دہلی کے آل انڈیا انسٹی ٹیوٹ آف میڈیکل سائنسز (ایمس) میں داخل کرایا گیا۔ذرائع کے مطابق کانگریس کے سینئر لیڈر اور سابق وزیر اعظم ک طبیعت بگڑ گئی ہے۔ انہیں بخار اور کمزوری کی شکایت کے بعد دہلی کے ایمس اسپتال میں داخل کرایا گیا ہے ۔ ڈاکٹر سنگھ ایمس کے سی این ٹاور میں زیر علاج ہیں۔ذرائع نے بتایا کہ ڈاکٹر سنگھ کی جانچ کے لیے ایمس کے ڈائریکٹر ڈاکٹر رندیپ گلیریا کی قیادت میں ایک میڈیکل بورڈ تشکیل دیا جا رہا ہے۔ ڈاکٹرسنگھ اس سال اپریل میں کورونا وائرس سے متاثر ہوئے تھے۔ تب بھی انہیں ایمس میں داخل کرایا گیا تھا ۔سابق وزیر اعظم نے اس سال 4 مارچ اور 3 اپریل کو کووڈ کا ٹیکہ لگوایا تھا ۔ ڈاکٹر سنگھ اس وقت راجستھان سے راجیہ سبھا کے رکن ہیں ۔ وہ سنہ 2004 سے 2014 تک وزیر اعظم رہے ۔ سنہ 2009 میں ایمس میں ہی ان کے دل کا آپریشن کیا گیا تھا ۔ (یو این آئی)
