ممبئی،25 نومبر(یو این آئی)مرکزی وزیر برائے اقلیّتی امور اور ڈپٹی لیڈر، راجیہ سبھا مختار عبّاس نقوی نے کہا کہ گذشتہ سات برسوں میں ہندوستان سے سفرِ حج کے انتظامات میں اہم اصلاحات اور سہولتوں کی فراہمی سے حج کے عمل کو بے حد آسان بنایا گیاہے انہوں نے یہ بات آج یہاں حج 2022 کی تیّاریوں سے متعلّق حج کمیٹی آف اِنڈیا کے اعلیٰ عہدیداران کے ساتھ میٹنگ کے دوران کہی انہوں نے کہا کہ حج سبسیڈی ختم کرنے، بغیر ’محرم‘ (مرد رشتہ دار) کے مسلم خواتین کے سفرِ حج پر لگی پابندی کو ختم کرنے، تمام حج کے عمل کو صد فیصد ڈیجیٹل کرنے وغیرہ جیسی اصلاحات سے ’اِیز آف ڈوئینگ حج‘ کو قوّت عطا ہوئی ہے۔انہوں نے کہا کہ حج کمیٹی آف اِنڈیا کا پورٹل، حج گروپ آرگنائزرس کا پورٹل، ڈیجیٹل ہیلتھ کارڈ، ’’ اِی۔ مسیحا“ صحت کے ضمن میں سہولیات، مکّہ۔مدینہ میں قیام کے لئے بلڈنگ / ٹرانسپورٹیشن کی معلومات ہندوستان میں ہی فراہم کرنے والی ’اِی۔لگیج ٹیگنگ‘کی سہولیات، اِی۔ویزا، جدید سہولیات سے لیس ’حج موبائل ایپ‘ وغیرہ سے ہندوستانی عازمینِ حج کی سہولیات، تحفظ، آسانیوں کی فراہمی کو یقینی بنایاگیا ہے اور بھارت میں حج2022کا پورا عمل صد فیصد آن۔ لائن / ڈیجیٹل ہو گا۔ اِنڈونیشیا کے بعد زیادہ تر عازمینِ حج ہندوستان سے روانہ ہوتے ہیں۔مسٹر نقوی کہاکہ عازمینِ حج کے اِنتخاب کا عمل کورونا ویکسین کی دونوں خوراک لئے جانے اور ہندوستان اور حکومتِ سعودی عرب کے ذریعہ حج 2022 کے اوقات کے تعیّن کئے جانے والے کورونا پروٹوکال، ہدایات اور رہنما اصولوں کو دھیان میں رکھ کر تیاریاں کی جا رہی ہیں۔انہوں نے کہا کہ حج 2022 کے لئے آن۔لائن درخواست دینے کے عمل کا آغاز یکم نومبر سے ہو چکا ہے اور آخری تاریخ 31 جنوری 2022 رکھی گئی ہے۔ حج کے لئے درخواست، آن۔ لائن اور ’حج موبائل ایپ‘ کے ذریعہ کئے جا رہے ہیں۔ اِس کی ٹیگ لائن ” حج ایپ اِن یور ہینڈ“ Haj App In Your Hand ہے۔ اِس میں حج کی درخواست، درخواست فارم بھرنے کی مکمل معلومات، درخواست فارم بھرنے کے عمل کا ویڈیو وغیرہ موجود ہے۔انہوں نے کہاکہ ابھی تک 20 ہزار سے زیادہ عازمینِ کرام نے حج 2022 کے لئے درخواست دی ہے۔ جس میں سو (100) سے زیادہ خواتین نے ’بغیر محر“ کے درخواست دی ہے۔ جبکہ بغیر’محرم‘ (مرد رشتہ دار) کے تقریباً تین ہزار (3000) سے زائد خواتین نے حج 21-22 20 کے لئے درخواست کی تھی۔ بغیر ”محرم“ سفرِحج کے لئے جن خواتین نے حج۔2022اور 2021 کے لئے درخواست دی تھی، ایسی درخواست حج 2022کے لئے بھی قابلِ قبول ہوں گی، بغیر ’محرم‘ کے حج پر جانے والی سبھی خواتین کو بغیر قرعہ اندازی کے حج پر جانے کے انتظامات کئے گئے ہیں۔مسٹر نقوی نے کہا کہ اس مرتبہ حج 2022 کے لئے اکّیس (۱۲) کے بجائے دس (۰۱) مراکزِ روانگی طے کئے گئے ہیں جن میں احمدآباد، بینگلورو، کوچّی، دِلّی، گواہاٹی، حیدرآباد، کولکاتہ، لکھنؤ، ممبئی اور سری نگر شامل ہیں۔انہوں نے کہا کہ احمدآباد مرکزِ روانگی سے گجرات کے عازمینِ حج، بینگلورو مرکزِ روانگی سے کرناٹک اور آندھرا پردیش کے چِتّور ضلع کے عازمینِ حج، کوچّی مرکزِ روانگی سے کیرل، لکشدیپ، پدّو چیری، تامل ناڈو، انڈمان اور نکوبار کے عازمینِ حج، دِلّی مرکزِ روانگی سے دِلّی، پنجاب، ہریانہ ہماچل پردیش، چنڈی گڈھ، اتراکھنڈ، مغربی اتر پردیش اور راجستھان کے عازمینِ حج، سفرِ حج 2022 پر جاسکیں گے۔ گواہاٹی مرکزِ روانگی سے آسام، میگھالیہ، منی پور، ناگا لینڈ، اروناچل پردیش اور سکم کے عازمینِ حج، حیدرآباد مرکزِ روانگی سے آندھرا پردیش اور تیلنگانہ کے عازمینِ حج، کولکاتہ مرکزِ روانگی سے مغربی بنگال، اوڈیشہ، تری پورہ، جھارکھنڈ اور بہار کے عازمینِ حج، حج 2022پر روانہ ہو سکیں گے۔لکھنؤ مرکزِ روانگی سے مغربی اتّرپردیش کو چھوڑ کر سارے اتّر پردیش کے عازمینِ حج، ممبئی مرکزِ روانگی سے مہاراشٹر، مدھّیہ پردیش، چھتّیس گڈھ، دمن اور دیو، دادرا اور نگر حویلی اور گوا کے عازمینِ حج اور سری نگر مرکزِ روانگی سے جمّوں، کشمیر، لیہہ۔ لداخ۔کارگل کے عازمینِ حج، حج 2022 پر جا سکیں گے۔
