دھار،18 جولائی:مدھیہ پردیش کے دھار اور کھرگون ضلع کے سرحدی کھل گھاٹ واقع نرمدا ندی کے پل پر آج مسافروں سے بھری بس ندی میں گر گئی۔اندور ڈیویژنل کمشنر پون شرما نے دونوں ضلعوں کے کلیکٹروں کو موقع پر پہنچنے کی ہدایت دی ہے۔اس دوران کھرگون ضلع کے کھل گھاٹ ،دھار ضلع کے دھامنود اور مضافات کے دیگر مقامات کی پولیس اور این ڈی آر ایف کی ٹیم بچاؤ کام کےلئے پہنچ گئی ہے۔ابتدائی اطلاع کے مطابق اب تک صرف دو مسافروں کو باہر نکالا جا سکا ہے۔مدھیہ پردیش کے وزیر داخلہ ڈاکٹر نروتم مشرا نے دھار اور کھرگون ضلع کی سرحد پر بس حادثے کے تناظر میں کہا کہ اب تک 12 لوگوں کی موت ہو چکی ہے، جب کہ 15 لوگوں کو بچا لیا گیا ہے۔
مشرا نے نامہ نگاروں کو بتایا کہ اندور سے پنے جا رہی مہاراشٹر حکومت کی بس دھمنود کے قریب کھل گھاٹ کے مقام پر نرمدا ندی میں گر گئی۔ تمام ذمہ دار انتظامی افسران اور ریسکیو ٹیمیں موقع پر پہنچ گئی ہیں۔ ریسکیو کی تمام کوششیں کی جا رہی ہیں۔ اب تک 15 افراد کو بچا لیا گیا ہے۔ تقریباً 12 افراد کے ہلاک ہونے کی اطلاع ہے۔
انہوں نے کہا کہ ابتدائی طور پر ایسا لگتا ہے کہ اسٹیئرنگ یا بریک فیل ہوگئی۔ بس کسی تکنیکی خرابی کے باعث ریلنگ ٹوٹ کر نیچے گر گئی۔ پانی کا بہاؤ بہت تیز ہے۔ڈاکٹر مشرا نے کہا کہ بس میں 50 سے 55 افراد کے سوار ہونے کی قیاس آرائیاں کی جارہی ہیں۔ اندور سے بس میں 12 لوگ سوار ہوئے تھے۔ حادثے کی وجہ معلوم کی جا رہی ہے۔اسی دوران دھار کے پولیس سپرنٹنڈنٹ آدتیہ پرتاپ سنگھ نے یو این آئی کو بتایا کہ بس حادثے کے بعد چلائے گئے بچاؤ آپریشن کے دوران اب تک 12 لوگوں کی لاشیں نکالی جا چکی ہیں۔ بس اندور سے مہاراشٹر کے املنیر جا رہی تھی۔ (یواین آئی)