وزیر اعظم کا یوم آزادی کے موقع پر قوم سے خطاب

ہندوستان کو 100 فیصد ترقی یافتہ ملک بنانے کے لیے ہم وطن پانچ پرن (عہد) لیں: مودی
نئی دہلی: وزیر اعظم نریندر مودی نے کہا کہ ہندوستانی معاشرہ توقعات سے بھرا ہوا ہے اور انہیں پورا کرنے کے لیے ہمیں ‘پنچ پرن (پانچ عہد) لینے ہوں گے، جن کی بنیاد پر 100 فیصد ترقی یافتہ ہندوستان کی تعمیر ہوگی جو ترقی کے ہر امتحان پر پورا اترے گا اور جس کا مرکز انسانیت ہو گی۔
پیر کو 76 ویں یوم آزادی کے موقع پر لال قلعہ کی فصیل سے ڈیڑھ گھنٹے تک جاری رہنے والے اپنے نویں خطاب میں مسٹر مودی نے کہا کہ ملک کا نوجوان توقعات سے بھرا ہوا ہے اور امنگوں کا طوفان ہے۔ وہ اب انتظار نہیں کرنا چاہتا اور ترقی یافتہ ملک کے آزادی پسندوں اور شہداء کے خواب کو اپنے سامنے پورا کرنا چاہتا ہے۔ انہوں نے کہا کہ ملک نے طویل عرصے تک انتظار کیا لیکن نوجوان نسل اب آنے والی نسل کو اس کا انتظار کرانے کے لئے مجبور نہیں ہے۔ انہوں نے کہا، ’’آزادی کے امرت دور کے پہلے دن میں دیکھ رہا ہوں کہ ہندوستان کے لوگ امنگوں سے بھرے ہوئے ہیں۔ ہر آدمی حالات کو بدلتا دیکھنا چاہتا ہے اور وہ اس تبدیلی کو اپنی آنکھوں سے دیکھنا چاہتا ہے۔
وزیر اعظم نے کہا کہ آج امرت کال کی پہلی صبح وہ نوجوان نسل سے ملک کو مکمل ترقی یافتہ قوم بنانے میں اپنا حصہ ڈالنے کی اپیل کرتے ہیں۔ انہوں نے کہا کہ اس کے لیے امرت کال کے 25 سال بہت اہم ہیں۔ انہوں نے کہا، “ہمیں ان برسوں میں اپنی طاقت پنچ پرن پر مرکوز کرنی ہوگی، ہمیں اپنی طاقت کو مرکوز کرنا ہے اور ہمیں ان پنچ پرنوں کو لے کر 2047 تک آزادی کے دیوانوں کے تمام خوابوں کو پورا کرنے کی ذمہ داری لیکر چلنا ہوگا۔
مودی نے تحقیق کو فروغ دینے کے لیے ’جئے انسندھان‘ کا نعرہ دیا
نئی دہلی:وزیر اعظم نریندر مودی نے پیر کو ‘جئے انسندھان کا نیا نعرہ دیا جس کا مقصد ملک کو خود انحصار بنانا اور مختلف شعبوں میں درآمدات پر انحصار کم کرنے کے لیے تحقیق کو فروغ دینا ہے۔76 ویں یوم آزادی پر ہم وطنوں سے خطاب کرتے ہوئے مسٹر مودی نے کہا کہ ملک کو خود کفیل بنانے اور دیسی مصنوعات کو فروغ دینے کے لیے تحقیق پر زور دینا ضروری ہو گیا ہے۔انہوں نے کہا کہ ہماری کوشش ہے کہ ملک کے نوجوانوں کو بے حد خلا سے لے کر سمندر کی گہرائیوں تک تحقیق کے لیے بھرپور مدد ملے۔ اسی لیے ہم خلائی مشن، ڈیپ اوشین مشن کو بڑھا رہے ہیں۔ خلا اور سمندر کی گہرائیوں میں ہمارے مستقبل کا لازمی حل ہے۔انہوں نے کہا کہ اب وقت آگیا ہے کہ ’جئے جوان، جئے کسان، جئے وگیان‘ کے بعد ہمیں ’جئے انسندھان‘ بھی کریں۔ اس کے لیے انہوں نے ‘جئے انسندھان’ کا نیا نعرہ بھی دیا۔مسٹر مودی نے کہا، ’’جئے جوان، جئے کسان کا لال بہادر شاستری جی کا منتر آج بھی ملک کے لیے متاثر کن ہے۔اٹل جی نے ‘جئے وگیان کہہ کر اس میں ایک کڑی جوڑی تھی۔ لیکن اب امرت دور کے لیے ایک اور ضرورت ہے، وہ ہے جئے انسندھان۔ جئے جوان، جئے کسان، جئے وگیان، جئے انسندھان۔”انہوں نے کہا کہ جیسے جیسے ملک میں سودیشی مصنوعات کے بارے میں بیداری بڑھ رہی ہے، بچوں میں بھی سودیشی کھلونوں کی خواہش بڑھ رہی ہے۔ بچے درآمد شدہ کھلونوں سے کھیلنے سے انکار کر رہے ہیں۔ انہوں نے کہا کہ حکومت کی اسکیموں کے تحت غیر ملکی کمپنیاں ہندوستان آ رہی ہیں اور سرمایہ کاری کے ساتھ نئی ٹیکنالوجی لا رہی ہیں، جس سے روزگار کے مواقع بڑھ رہے ہیں اور ملک کو مینوفیکچرنگ کا مرکز بنا رہے ہیں۔ انہوں نے کہا، ’’آج جب ہم دنیا کو برہموس فراہم کر رہے ہیں، ہر ہندوستانی کو اس پر فخر ہوتا ہے۔
خاندان پرستی پر مودی کا زوردار حملہ، ہم وطنوں سے تعاون مانگا
نئی دہلی، 15 اگست:وزیر اعظم نریندر مودی نے آج سیاست میں خاندان پروری پر سخت حملہ کرتے ہوئے کہا کہ اس سے ملک کی ترقی میں رکاوٹ آتی ہے اور باصلاحیت لوگوں کو ترقی کا موقع نہ ملنے پر مایوسی پیدا ہوتی ہے۔لال قلعہ کی فصیل سے قوم سے خطاب کرتے ہوئے مسٹر مودی نے کہا کہ خاندان پرستی سیاست میں خاندان سے باہر کے لوگوں کے لیے تمام مواقع ختم کردیتی ہے، اس لیے انہیں سیاست سے خاندان پرستی کو ختم کرنے کی لڑائی میں سب کے تعاون کی ضرورت ہے اور اس لڑائی میں جہاں بھی ملک کا کوئی شہری کھڑا ہوگا وہ اس کا ساتھ دیں گے۔انہوں نے خاندان پرستی کی ذہنیت کو خطرناک قرار دیتے ہوئے کہا کہ خاندانی سیاست میں خاندان کا کسی سے کوئی تعلق نہیں ہوتا۔ انہوں نے کہا کہ وہ لال قلعہ سے یہ بتانا چاہتے ہیں کہ ملک اور ہندوستان کی صفائی کے لیے ملک کو خاندان پرستی کی سیاست سے آزاد کرنے کی اشد ضرورت ہے۔انہوں نے خاندان پرستی کی سیاست سے ملک کی آزادی کو ضروری قرار دیتے ہوئے کہا کہ یہ سیاست باصلاحیت لوگوں کے ذہنوں میں مایوسی پیدا کرتی ہے۔ انہوں نے کہاکہ سب کا دل کرتا ہے، اس میں صلاحیت تھی، اگر کوئی اس کا چچا، تاؤ ہوتا تو اس کی صلاحیت اس کے کام آتی۔انہوں نے ملک کے نوجوانوں کے روشن مستقبل کے خوابوں کو شرمندہ تعبیر کرنے کے لیے خاندان پرستی کے خلاف جنگ کو ضروری قرار دیا اور کہا کہ اگر کوئی یہ لڑائی لڑتا ہے اور خاندان پرستی کی سیاست کے خلاف کھڑا ہوتا ہے تو وہ اس لڑائی میں ان کے ساتھ کھڑے ہوں گے۔ اقربا پروری اور خاندان پرستی کے خلاف متحد ہو کر لڑنے کی اپیل کرتے ہوئے انہوں نے کہا کہ اس طرح کی سیاست سے پیدا ہونے والی مایوسی سے لوگوں کو بچانے کے لیے سب کو اقربا پروری کے خلاف لڑنا ہے۔
آزادی کے امرت دور کے لیے مودی نے پنچپران کا منتر دیا
نئی دہلی، 15 اگست:وزیر اعظم نریندر مودی نے آزادی کی 75 ویں سالگرہ کے موقع پر آج ملک کو پنچپران کا منتر دیا اور ہم وطنوں سے اپیل کی کہ آج سے شروع ہورہے ‘امرت کال میں ہمیں ملک کو انسانیت پر مبنی ترقی یافتہ ہندوستان بنانے کے لیے بڑے عزم اور بڑے خوابوں کے ساتھ آگے کا سفر شروع کریں۔یہاں تاریخی لال قلعہ کی فصیل سے ملک کے 76ویں یوم آزادی کی مرکزی تقریب سے خطاب کرتے ہوئے مسٹر مودی نے کہا، "آنے والے 25 سالوں کے لیے، ہمیں اپنی طاقت، عزم اور صلاحیت کو ‘پنچ پران’ پر مرکوز کرنا ہوگا۔” انہوں نے کہا کہ پہلا پران ہے – اب ملک ایک بڑے عزم کے ساتھ آگے بڑھے گا اور وہ عزم ایک ترقی یافتہ ہندوستان بنانے کا ہے۔ دوسرا پران ہے اگر ذہن کے اندر کسی کونے میں غلامی کا کوئی نشان بھی موجود ہے تو ہمیں اس سے چھٹکارا حاصل کرنا ہو گا۔ تیسرا پران ہے – ہمیں اپنے ورثے پر فخر ہے۔ چوتھا پران اتحاد و یکجہتی اور پانچواں پران شہریوں کا فرض ہے۔
وزیر اعظم نے کہا کہ آج ملک کی نوجوان نسل پرامید نسل ہے اور وہ اپنی آنکھوں کے سامنے ہندوستان کو ترقی کرتے ہوئے دیکھنا چاہتے ہیں۔ جو نوجوان آج 25 سال کے ہیں وہ آزادی کے صد سالہ سال میں 50-55 سال کے ہو جائیں گے۔ ان کی زندگی کا سنہری دور ہندوستان کے خوابوں کو پورا کرنے کا دور ہے۔ انہوں نے کہا کہ نوجوان بڑے عزم کے ساتھ چلیں، اب ملک رکنے والا نہیں ہے۔ انہوں نے کہا کہ ہم انسانیت پر مبنی نظام تیار کریں گے۔ انسانیت پر مبنی ترقی کے لیے دنیا کے سامنے مثال بنیں۔صفائی سے لے کر بجلی اور پانی تک کئی شعبوں میں ملک کے شہریوں کی طرف سے حاصل کی گئی کامیابیوں کا ذکر کرتے ہوئے مسٹر مودی نے کہا کہ آنے والے 25 سال ہمیں پران اور عزم کے ساتھ متحد ہو کر ہر شعبے میں خود انحصاری کے لیے کام کرنا چاہیے۔ انہوں نے کہا کہ خود انحصار ہندوستان کسی حکومت کا پروگرام نہیں ہے۔ یہ معاشرے کا خواب ہے۔ یہ ہر شہری کی ذمہ داری ہے۔ 130 کروڑ ہندوستانیوں کی ٹیم انڈیا ہندوستان کے خوابوں کو شرمندہ تعبیر کرے گی۔
بدعنوانی اور خاندان پرستی کے خلاف پوری طاقت سے لڑنا ہو گا: مودی
نئی دہلی، 15 اگست//وزیر اعظم نریندر مودی نے پیر کو بدعنوانی اور اقربا پروری۔ خاندان پرستی کو ملک کے سامنے دو بڑے چیلنج قرار دیتے ہوئے کہا کہ یہ صورتحال اچھی نہیں ہے اور اس کا پوری طاقت سے مقابلہ کرنا ہوگا۔آج یہاں 76ویں یوم آزادی کے موقع پر لال قلعہ کی فصیل سے ہم وطنوں سے خطاب کرتے ہوئے مسٹر مودی نے کہا،ملک کے سامنے دو بڑے چیلنجز ہیں۔ پہلا چیلنج – بدعنوانی، دوسرا چیلنج – اقربا پروری، خاندان پرستی۔ایک طرف وہ لوگ ہیں جن کے پاس رہنے کی جگہ نہیں ہے اور دوسری طرف وہ لوگ ہیں جن کے پاس چوری کا سامان رکھنے کی جگہ نہیں ہے۔ یہ صورتحال اچھی نہیں ہے۔ ہمیں ان کے خلاف پوری قوت سے لڑنا ہوگا۔انہوں نے کہا کہ حکومت کی کوشش ہے کہ جن لوگوں نے ملک کو لوٹا ہے وہ اس کی تلافی بھی کرے۔ انہوں نے کہا کہ بدعنوانی ملک کو دیمک کی طرح کھوکھلا کر رہی ہے، ملک کو اس سے لڑنا ہی ہو گا۔ ہماری کوشش ہے کہ جن لوگوں نے ملک کو لوٹا ہے ان کو واپس بھی کرنا پڑے، ہم اس کی کوشش کر رہے ہیں۔یہ بتاتے ہوئے کہ ملک کے بیشتر اداروں پر اقربا پروری کا غلبہ ہے، انہوں نے کہا، “جب میں اقربا پروری اور خاندان پرستی کی بات کرتا ہوں تو لوگ سمجھتے ہیں کہ میں صرف سیاست کی بات کر رہا ہوں۔ نہیں، بدقسمتی سے سیاسی میدان کی اس برائی نے ہندوستان کے ہر ادارے میں خاندان پرستی کو پروان چڑھایا ہے۔انہوں نے کہا کہ سب کو مل کربدعنوانی کے خلاف نفرت کا جذبہ پیدا کرنا ہوگا اور اس ذہنیت کے خلاف مضبوطی سے لڑنا ہوگا۔ انہوں نے کہا کہ یہ ذہنیت اس وقت تک ختم نہیں ہونے والی ہے جب تک بدعنوانی اور بدعنوانوں کے خلاف نفرت پیدا نہیں ہوتی، وہ انہیں سماجی طور پر حقارت کی نگاہ سے دیکھنے پر مجبور نہیں کرتے۔
عزم سے ہر گھر کو ‘نل سے پانی ملا: مودی
نئی دہلی، 15 اگست: وزیر اعظم نریندر مودی نے کہا کہ ہر مقصد کو حاصل کرنے میں عزم ضروری ہوتا ہے اور اسی عزم کا نتیجہ ہے کہ آج ملک کے ہر گھر میں ‘نل سے صاف پانی فراہم کرنے کا کام تیزی سے جاری ہے۔پیر کو لال قلعہ کی فصیل سے قوم سے خطاب کرتے ہوئے مسٹر مودی نے کہا کہ ہر عہد میں کامیابی ہوتی ہے اور یہی وجہ ہے کہ 2019 میں انہوں نے اس فصیل سے ملک کے ہر گھر کو نل سے پانی پہنچانے کا عہد لیا جو تیزی سے آگے بڑھ رہا ہے اور انہیں یقین ہے کہ یہ کام 2024 کے مقررہ ہدف تک مکمل کرلیا جائے گا۔انہوں نے کہا کہ لاکھوں خاندانوں کو نل سے پانی فراہم کرنے کا کام عزم و ہمت سے ہی ممکن ہوسکا ہے۔ اگر ہم ایک عزم کے ساتھ چلیں تو مقصد خود بخود حاصل ہو جاتا ہے اور اسی عزم کا نتیجہ ہے کہ ملک کے ہر گھر کو نل سے پانی پہنچ رہا ہے۔وزیر اعظم نے کہا کہ اب قوم کے پاس آزادی کی 100ویں سالگرہ منانے کے لیے اگلے 25 سالوں میں ‘امرت کال’ کا عزم ہے اور ہمیں اس مدت میں طے شدہ ہدف کو پورا کرنے کے لیے عزم کے ساتھ کام کرنا ہے۔
خواتین کو احترام اور موقع دینے سے امرت کال کو نئے پنکھ لگیں گے: مودی
نئی دہلی، 15 اگست:وزیر اعظم نریندر مودی نے پیر کو یوم آزادی کے موقع پر کہا کہ ملک کی خوشحالی کے لئے خواتین کی طاقت کی توہین نہیں کرنے اور انہیں فخر کے ساتھ مواقع فراہم کرنے سے ملک کی ترقی کو رفتار ملے گے اور ‘امرت کال’ میں ملک کو آگے لے جانے کے لیے مزید پنکھ لگیں گے۔76ویں یوم آزادی کے موقع پر لال قلعہ کی فصیل سے قوم سے خطاب کرتے ہوئے مسٹر مودی نے کہا کہ وہ خواتین کی طاقت میں ترقی کی رفتار کو واضح طور پر دیکھ رہے ہیں اور وہ محسوس کرتے ہیں کہ اگر خواتین کو فخر اور احترام دیکر اس عمل سے جوڑا جائے تو اگلے 25 سالوں یعنی ملک کی آزادی کے 100 سال کے اس امرت کال میں قوم کی ترقی کو مزید پنکھ لگیں گے۔خواتین کی توہین کو اپنے اندر کا درد بتاتے ہوئے مسٹر مودی نے ہم وطنوں سے خواتین کی توہین نہ کرنے کا عہد لینے کی اپیل کی اور کہا کہ ’’کسی نہ کسی وجہ سے ہمارے اندر ایسی خرابی پیدا ہو گئی ہے جس میں ہم اپنے الفاظ سے، سلوک سے خواتین کی توہین کرتے ہیں۔ معاشرے کو اس بگاڑ سے نجات دلانے کے لیے ہمیں اپنے مزاج اور عمل سے خواتین کی توہین سے آزادی حاصل کرنے کا عہد کرنا چاہیے۔وزیراعظم نے کہا کہ خواتین کی طاقت میں ترقی کی طاقت وہ اپنی آنکھوں سے دیکھ رہے ہیں۔ وہ دیکھ رہے ہیں کہ خواتین کی عزت کرنا، اسے وقار دینا اور اس کی توہین نہ کرنا قوم کے خواب کو پورا کرنے کی سمت میں بہت بڑی طاقت ثابت ہونے والا ہے، اس لیے ضروری ہے کہ خواتین کی عزت اور ان کا غرور برقرار رکھنے کا عہد ٖضروری ہے۔انہوں نے کہا کہ خواتین کی طاقت ملک میں ایک طاقت کے طور پر سامنے آرہی ہے اور آئندہ 25 سالوں میں یہ طاقت ملک کی ترقی میں اہم کردار ادا کرنے والی ہے۔ اس لیے ملک کی بیٹیوں کو زیادہ سے زیادہ سہولیات اور مواقع فراہم کرنا اور ان کو عزت دینا سب کی ذمہ داری ہونی چاہئے۔ انہوں نے کہا کہ اگر ہم امرت کال میں خواتین کی طاقت کو جوڑیں گے تو ہمارے خوابوں کو مزید پنکھ لگ جائیں گے۔وزیر اعظم نے اس تناظر میں شہری فرض کا بھی حوالہ دیا اور اسے ایک عظیم طاقت قرار دیا۔ ان کا کہنا تھا کہ نظم و ضبط کی زندگی، فرض سے لگن کسی بھی ملک کو ترقی کی راہ پر لے جانے کا ایک بڑا منتر ہے۔انہوں نے کہا کہ حکومت کا کام ملک کے عوام کو بجلی فراہم کرنا ہے لیکن شہری کا فرض ہے کہ وہ ضرورت کی بجلی خرچ کرے اوراسے بے کار خرچ نہ کرکے ہر یونٹ بچانے کی کوشش کرے ۔ اسی طرح حکومت کا کام ہر گھر تک پانی پہنچانا ہے، لیکن پانی کی بربادی نہیں ہونی چاہیے، یہ ملک کے شہریوں کا فرض ہے۔ جس ملک کے شہری یہ فرائض سرانجام دیتے ہیں، وہ ملک یقیناً ترقی کی بلندی پر پہنچتا ہے۔