نئی دہلی، 2 اکتوبر: اتر پردیش کے سابق وزیر اعلی اور سماج وادی پارٹی کے بانی سرپرست ملائم سنگھ یادو کو اچانک طبیعت خراب ہونے پرگروگرام کے میڈانتا اسپتال میں داخل کرایا گیا ہے جہاں ان کی حالت مستحکم ہے۔ذرائع کے مطابق دہلی کے قریب گروگرام کے ایک پرائیویٹ اسپتال میدانتا میں داخل مسٹر ملائم سنگھ یادو کی طبیعت اچانک بگڑ گئی اور اتوار کو انہیں آئی سی یو میں منتقل کیا گیا۔دریں اثنا، سماج وادی پارٹی نے ٹویٹ کر کے کہا، ’’محترم نیتا جی گروگرام کے میدانتا اسپتال کے آئی سی یو میں بھرتی ہیں، ان کی حالت مستحکم ہے۔ سینئر ڈاکٹروں کی نگرانی میں ان کا علاج جاری ہے۔
ایک اور ٹویٹ میں، پارٹی نے کہا، "محترم نیتا جی آئی سی یو میں داخل ہیں، ان کی حالت مستحکم ہے۔ آپ سب سے عاجزانہ گزارش ہے کہ اسپتال نہ آئیں۔ نیتا جی کی صحت کے بارے میں آپ کو وقتاً فوقتاً معلومات فراہم کی جائیں گی۔بتایا جا رہا ہے کہ انہیں پیشاب میں انفیکشن کی وجہ سے اسپتال میں داخل کرایا گیا تھا۔ اسپتال میں ہیلتھ چیک اپ کے دوران آکسیجن لیول کم ہونے کی وجہ سے انہیں آئی سی یو میں بھیج دیا گیا۔ذرائع نے بتایا کہ سماج وادی پارٹی کے صدر اور ملائم سنگھ یادو کے بیٹے اکھلیش یادو اور ان کی اہلیہ ڈمپل یادو اسپتال پہنچ گئے ہیں۔ مسٹراکھلیش یادو نے مسٹرملائم سنگھ یادو کا علاج کرنے والے ڈاکٹروں سے طویل بات چیت کی ہے۔ بتایا جا رہا ہے کہ مسٹرملائم سنگھ یادو کے چھوٹے بھائی شیو پال سنگھ یادو بھی دہلی میں موجود ہیں۔
مسٹر ملائم سنگھ یادو کی حالت دیکھتے ہوئے ان کے اہل خانہ اور خیر خواہ اسپتال پہنچ رہے ہیں۔ذرائع نے بتایا کہ وزیر اعظم نریندر مودی نے ایس پی صدر اکھلیش یادو کو فون کیا اور مسٹر ملائم سنگھ یادو کی صحت کے بارے میں دریافت کیا۔ وزیراعظم نے انہیں ہر ممکن مدد کی یقین دہانی کرائی ہے۔
تمل ناڈو کے وزیر اعلی ایم کے اسٹالن اور بہار کے وزیر اعلی نتیش کمار نے مسٹرملائم سنگھ کی جلد صحت یابی کی خواہش کی ہے۔ (یو این آئی)