کراچی، 16 دسمبر: پاکستان کے سب سے کامیاب ٹیسٹ بلے بازوں میں سے ایک اور سابق کپتان اظہر علی نے انگلینڈ کے خلاف جاری سیریز کے تیسرے اور آخری میچ کے بعد ٹیسٹ کرکٹ سے ریٹائرمنٹ کا اعلان کر دیا ہے۔اظہر نے جمعہ کو ایک بیان میں کہاکہ ’’میرے لیے اعلیٰ سطح پر اپنے ملک کی نمائندگی کرنا اعزاز کی بات ہے۔ ریٹائرمنٹ کا فیصلہ کرنا ہمیشہ مشکل ہوتا ہے لیکن گہری سوچ کے بعد مجھے لگتا ہے کہ ٹیسٹ کرکٹ کو الوداع کہنے کا یہ صحیح وقت ہے۔ ‘‘اظہر نے اب تک 96 ٹیسٹ میچوں میں 42.49 کی اوسط سے 7097 رنز بنائے ہیں۔ 12 سال پر محیط کیریئر میں انہوں نے 19 سنچریاں اور 35 نصف سنچریاں اسکور کیں، ان کا بہترین اسکور ویسٹ انڈیز کے خلاف ڈے نائٹ میچ میں ناٹ آؤٹ 302 رنز تھا۔ ان کے نام آٹھ وکٹیں بھی ہیں۔ انہوں نے کرکٹ کے طویل ترین فارمیٹ میں 2010 میں آسٹریلیا کے خلاف لارڈز میں ڈیبیو کیا۔
کراچی میں انگلینڈ کے خلاف انہیں اپنے ٹیسٹ رنز میں اضافہ کرنے اور اپنے ٹیسٹ کیریئر کو بلندی پر ختم کرنے کا ایک اور موقع ملے گا۔ انہوں نے 2016 اور 2020 کے درمیان نو مواقع پر ٹیم کی کپتانی بھی کی۔ اس کے علاوہ انہوں نے پاکستان کے لیے 53 ون ڈے اور 49 ٹی ٹوئنٹی انٹرنیشنل بھی کھیلے ہیں جس میں انہوں نے بالترتیب 1895 اور 985 رنز بنائے ہیں۔اظہر نے کہاکہ ’’بہت سے لوگ ہیں جن کا میں شکر گزار ہوں کہ انہوں نے اس مشکل سفر میں میرا ساتھ دیا۔ میں اپنے خاندان کا خاص ذکر کرنا چاہوں گا جن کی قربانیوں کے بغیر میں آج اس مقام پر نہیں ہوتا۔ میرے والدین، اہلیہ، بہن بھائی اور بچے ہمیشہ میری طاقت رہے ہیں۔”اظہر کو مبارکباد دیتے ہوئے پاکستان کرکٹ بورڈ کے چیئرمین رمیز راجہ نے کہاکہ “اظہر علی پاکستان کرکٹ کے سب سے پرعزم کھلاڑیوں میں سے ایک رہے ہیں۔ ان کا حوصلہ اور عزم بہت سے نوجوان کرکٹرز کے لیے متاثر کن رہا ہے اور وہ آنے والے کرکٹرز کے لیے ایک رول ماڈل ہیں۔
