کرگل ؍؍رنگ یل نیوزسروس؍؍ضلع کرگل کے مختلف اسکولوں میں زیر تعلیم ہونہاربچوں میں ہل کونسل کرگل کی جانب سے سبسیڈی اجزاکے تحت کانفرنس ہال برومیں ایک تقریب منعقد ہوئی جسکے دوران طلبہ میں لیپ ٹاپ تقسیم کئے گئے ۔اس موقع پرہل کونسل کرگل کے ایگزیکٹو کونسلر سید مہدی فاضلی، ڈپٹی کمشنرکرگل سنتوش سکھ دیو، چیف ایجوکیشن آفیسر کرگل،مشتاق احمد وانی، ڈسٹرکٹ ایجوکیشن پلاننگ آفیسر کرگل محمد امین اورضلع کے مختلف تعلیمی زونز کے زونل ایجوکیشن آفیسران کے علاوہ محکمہ تعلیم کرگل کے دیگراعلیٰ آفیسران اور طلباء موجود تھے۔
اس موقع پرتقریب سے خطاب کرتے ہوئے ہل کونسل کرگل کے سربراہ فیروزاحمدخان نے طلبا میں لیپ ٹاپ تقسیم کرنے کے مقصدکو بیان کرتے ہوئے کہا کہ تعلیم ایک اہم شعبہ ہے اس حقیقت کو مدنظر رکھتے ہوئے یہ اقدام ہل کونسل کے سبسڈی اجزاء کے تحت ہونہار طلباء کی صلاحیتوں کو بڑھانے کے لیے کیا گیا ہے۔جبکہ اس طرح غریبی کی سطح سے نیچے زندگی گزربسر کرنے والے طلباء کو لیپ ٹاپ فراہم کرنے کے لیے تجاویز سامنے آ رہی ہیں اور توقع ہے کہ اگلے مالی سال میں بھی یہ عمل انجام دیا جائے گا۔نیز مسٹرخان نے بہتر بنیادی ڈھانچہ اور معیاری تعلیم کی وجہ سے ضلع کرگل کے سرکاری اسکولوں میں طلباء کے بڑھتے ہوئے داخلے پر خوشی کا اظہار کرتے ہوئے
یہ یقین دہانی کرائی کہ ہائر سیکنڈری سطح پر ایک سو سات 107 خالی آسامیاں کنٹریکٹ یعنی عارضی بنیادوں پر پُر کی جائیں گی اس کے علاوہ سمگارا شکشا کے تحت نئے اپ گریڈ شدہ اسکولوں کے لیے جن میں آتنگ، ساپی اور چلیچن کے ہائی اسکول شامل ہیں کے لیے ٹیچنگ اور نان ٹیچنگ اسٹاف کو جلد ہی تعینات کیا جائے گا۔اس دوران انھوں نے لیپ ٹاپ حاصل کرنے والے ہونہار طلباء کو مزید مبارکبادپیش کرتے ہوئے انہیں مشورہ دیا کہ وہ اسے پڑھائی کے لیے استعمال کریں اور لگن کے ساتھ اپنی پڑھائی پر توجہ دیں۔اس موقع پر ڈپٹی کمشنر سنتوش سکھ دیو نے اپنے خطاب میں موجودہ جدیدٹیکنالوجی بالخصوص ڈیجیٹل دنیا میں بہتر تعلیم کے حصول کے لئے طلبا کو درکارضروریات کو پوراکرنے کی اہمیت کو اجاگرکرتے ہوئے کہاکہ طلبہ کی بہتری کے لیے ڈیجیٹل خلا کو پُر کرنے کی ضرورت ہے اور اس مقصد کے ساتھ ہونہار طلبہ کی شناخت کی گئی ہے۔
نیز انھوںنے امید ظاہر کی کہ پسماندہ اورغریب طبقہ سے تعلق رکھنے والے طلباء اس اسکیم سے فائدہ اٹھائیں گے اور انہیں مشورہ دیا کہ وہ حاصل کردہ اس آلات کو صحیح استعمال کرکے زیادہ سے زیادہ فائدہ اٹھائیں۔نیز انھوں نے یقین دلایا کہ متعلقہ محکمے کی جانب سے بھیجی جانے والی شکایات کا مرحلہ وار ازالہ کیا جائے گا۔اس دوران ایکزیکیٹوکونسلرآغا سید مہدی فاضلی نے ہل کونسل کرگل اور محکمہ کو ایسے اقدامات کرنے پر سراہاجس سے طلباء کو ڈیجیٹل میڈیم کے ذریعے سیکھنے میں مدد ملے گی۔ واضح رہے کہ ضلع کرگل کے سات تعلیمی زونزسے وابستہ کل بتالیس 42 لیپ ٹاپ ہونہار طلباء میں تقسیم کیے گئے ۔
