حقوق سے محروم لوگوں کے حق میں دو بلیں پاس کی گئیں
سرینگر /06دسمبر:حکومت کی طرف سے لائے گئے جموں و کشمیر سے متعلق دو بل ان لوگوں کو انصاف فراہم کریں گے جو پچھلے 70 سالوں سے اپنے حقوق سے محروم ہیں کی بات کرتے ہوئے وزیر داخلہ امیت شاہ نے زور دے کر کہا کہ بے گھر لوگوں کو ریزرویشن ملے گا۔ انہوں نے مزید کہا کہ 1980کی دہائی کے بعد جموں کشمیر میں دہشت گردی کا دور تھا اور یہ ایک ہولناک منظر تھا۔ جو لوگ اس زمین پر رہتے تھے اسے اپنا ملک سمجھتے تھے، انہیں باہر پھینک دیا گیا اور کسی نے ان کی پرواہ نہیں کی، نہ ہی انہوں نے روکنے کی کوشش کی۔سٹار نیوز نیٹ ورک کے مطابق لوک سبھا میں جموں کشمیر سے متعلق دو بل پاس کرنے کے بعد اپنے خطاب میں وزیر داخلہ امیت شاہ نے کہا کہ حکومت کی طرف سے لائے گئے جموں و کشمیر سے متعلق دو بل ان لوگوں کو انصاف فراہم کریں گے جو پچھلے 70 سالوں سے اپنے حقوق سے محروم ہیں اور زور دے کر کہا کہ بے گھر لوگوں کو ریزرویشن ملے گا۔ جموں و کشمیر ریزرویشن (ترمیمی) بل اور جموں و کشمیر ری آرگنائزیشن (ترمیمی) بل پر بحث کا جواب دیتے ہوئے امیت شاہ نے کہا کہ اگر ووٹ بینک کی سیاست پر غور کیے بغیر شروع میں دہشت گردی سے نمٹا جاتا تو کشمیری پنڈتوں کو وہاں سے نہیں جانا پڑتا۔ انہوں نے کہا کہ ایک بل میں ان لوگوں کو اسمبلی میں نمائندگی دینے کی کوشش کی گئی ہے جنہیں دہشت گردی کی وجہ سے کشمیر چھوڑنا پڑا۔انہوں نے کہا کہ بلوں کا مقصد ان لوگوں کو انصاف فراہم کرنا ہے جو پچھلے 70 سالوں سے محروم تھے۔امیت شاہ نے پسماندہ طبقات کے بارے میں بات کرنے پر کانگریس پر بھی تنقید کی اور کہا کہ اگر کسی پارٹی نے پسماندہ طبقات کی مخالفت کی ہے اور ان کی ترقی کی راہ میں رکاوٹ بنی ہے تو وہ کانگریس ہے۔انہوں نے کہا کہ نریندر مودی ایک غریب گھرانے میں پیدا ہوئے اور وزیر اعظم بنے اور وہ پسماندہ طبقات اور غریبوں کا درد جانتے ہیں۔ تقریر کرتے ہوئے امیت شاہ نے کہا ’’سال 1980کی دہائی کے بعد جموں کشمیر میں دہشت گردی کا دور تھا اور یہ ایک ہولناک منظر تھا۔ جو لوگ اس زمین پر رہتے تھے اسے اپنا ملک سمجھتے تھے، انہیں باہر پھینک دیا گیا اور کسی نے ان کی پرواہ نہیں کی، نہ ہی انہوں نے روکنے کی کوشش کی۔ درحقیقت، وہ لوگ اسے روکنے کے ذمہ دار تھے، وہ انگلینڈ میں چھٹیوں کا مزہ لے رہے تھے‘‘۔ انہوں نے کہا ’’ جب کشمیری پنڈت بے گھر ہوئے تو انہیں اپنے ملک میں پناہ گزینوں کے طور پر رہنے پر مجبور کیا گیا۔ تقریباً 46,631 خاندان اپنے ہی ملک میں بے گھر ہوئے۔ یہ بل انہیں حقوق دلانے کیلئے ہے، یہ بل انھیں نمائندگی دینے کیلئے ہے ‘‘۔ امیت شاہ نے زور دیکر کہا کہ جواہر لعل نہرو نے تاریخی غلطی کی، اس سے پہلے کہ پورا جموں و کشمیر ہمارے ساتھ تھا جنگ بندی پر راضی ہو گئے اور ہمارے اندرونی مسائل کو اقوام متحدہ میں لے گئے۔