جموں، 26 جولائی : ایمپلائز پروویڈنٹ فنڈ آرگنائزیشن (ای پی ایف او) کا کہنا ہے کہ اب مرکز کا پروویڈنٹ فنڈ ایکٹ جموں و کشمیر اور لداخ میں بھی لاگو ہو چکا ہے جس کے تحت ان یونین ٹریٹریوں میں نجی سیکٹر میں کام کرنے والے ملازموں کو بھی پنشن ملے گی۔یہ باتیں آرگنائزیشن کے ایک عہدیدار رضوان الدین نے پیر کے روز یہاں نامہ نگاروں کے ساتھ بات کرنے کے دوران کہیں۔انہوں نے کہا: ‘پہلے جموں و کشمیر اور لداخ کے پرائیویٹ ملازموں کا پروویڈنٹ فنڈ جموں و کشمیر ایمپلائز پروویڈنٹ فنڈ میں ہی جمع ہوتا تھا لیکن اب جموں و کشمیر اور لداخ یونین ٹریٹریز بن گئی ہیں لہٰذا اب دونوں یونین ٹریٹریوں میں مرکزی پروویڈنٹ فنڈ ایکٹ لاگو ہوا ہے۔ان کا کہنا تھا: ‘اس ایکٹ کے تحت اب ان یونین ٹریٹریوں کی نجی کمپنیوں میں کام کرنے والے ملازمین جنہوں نے دس برسوں تک پروویڈنٹ فنڈ بھرا ہو، کو پنشن ملے گی۔موصوف نے کہا کہ اگر کسی ملازم کی دوران ملازمت کسی وجہ سے موت واقع ہوجائے تو اس کے لواحقین کو ایک سال تک پنشن ملے گی۔انہوں نے کہا کہ ہم نے سری نگر اور لداخ میں بھی اپنے دفتر کھولے ہیں۔(یو این آئی)
