نگران نیوز ڈیسک: ڈپٹی کمشنر سرینگر اکشے لبرو نے جمعہ کو بتایا کہ شہر کے عالی کدل اور زینہ کدل پلوں پر باڑ لگانے کا کام ایک ہفتہ کے اندر مکمل کیا جائے گا۔ موصوف نے ان باتوں کا اظہار پلوں پر جاری کام کا جائزہ لینے کے دوران ذرائع ابلاغ کیساتھ بات چیت کے دوران کیا۔ نگران نیوز ڈیسک کے مطابق ڈپٹی کمشنر اکشے لبرو نے بتایا کہ عالی کدل، زینہ کدل (اُولڈ) اور زینہ کدل (نیو) پلوں پر جاری باڑ لگانے کا کام آخری مرحلہ میں چل رہا ہے۔ انہوں نے کہا کہ یہ پروجیکٹ شہر خاص کے لوگوں کا دیرینہ مطالبہ تھا کیوں کہ اس سے عام لوگوں کی حفاظت اور سلامتی جڑی ہوئی ہیں۔ ان پلوں پر کام مکمل ہونے کے بعدحادثات پر بہت حد تک قابو پایا جائے گا اور یہ حادثات کو روکنے کیلئے ایک بڑا قدم ہے۔ انہوں نے کہا کہ مقامی لوگوں کے ایک وفد نے یہ معاملہ ہمارے دفتر آکر اُٹھایا تھا جس کے بعد متعلقہ محکمہ نے یہاں آکر صورتحال کا جائزہ لینے کے بعد کام کا آغاز کیا۔ڈپٹی کمشنر اکشے لبرو کا کہنا تھا کہ ان پلوں پر کام آخری مرحلہ میں چل رہا ہے اور ایک ہفتہ کے اندر مکمل ہوگا۔ ان کا مزید کہنا تھا کہ پلوں کے علاوہ شہر کے کئی علاقوں میں اندرونی سڑکوں کی تجدید و مرمت کا کام بھی انتظامیہ آنیوالے دنوں میں شروع کرے گی۔
