نگران نیوز
سری نگر// لیفٹیننٹ گورنر منوج سنہا نے کہا ہے کہ جموں و کشمیر ایک "انتہائی نازک موڑ” پر کھڑا ہے اور نوجوانوں میں منشیات کے استعمال کی بڑھتی ہوئی لعنت سے نمٹنے کے لیے ایک متحدہ عوامی تحریک پر زور دیا۔جموں و کشمیر منشیات کی لت کے ماحولیاتی نظام کیخلاف عوامی آگاہی مہم شروع کرنے جارہا ہے۔ 11 اپریل سے نشا مکت جموں کشمیر ابھیان کے تحت 100 روزہ مہم کا لیفٹیننٹ گورنر منوج سنہا نے جمعرات کو جائزہ لیا۔یہ مہم پنچایت سطح سے لے کر یونین ٹیریٹری کی سطح تک شروع ہوگی، جس کی قیادت خود ایل جی کریں گے۔ اس میں نہ صرف معاشرے کے تمام طبقات شامل ہوں گے بلکہ اس مسئلے کو قانونی، فوجداری اور بحالی کے محاذوں پر بھی نشانہ بنایا جائے گا۔سنہا نے ایک ویڈیو پیغام کے ذریعے یونین ٹیریٹری کے لوگوں سے خطاب کرتے ہوئے کہا کہ دوستو، جموں و کشمیر آج ایک انتہائی نازک موڑ پر کھڑا ہے۔ ایک خاص سازش کے تحت ہمارے نوجوانوں کو منشیات کی لت میں دھکیلنے اور ایک پوری نسل کو تباہ کرنے کی کوشش جاری ہے۔اب تک کی گئی کوششوں کا ذکر کرتے ہوئے لیفٹیننٹ گورنر نے کہا کہ وزیر اعظم نریندر مودی کی قیادت میں 2020 میں شروع کی گئی نشا مکت بھارت ابھیان نے مرکز کے زیر انتظام علاقے میں منشیات کے خلاف اہم اقدامات کیے ہیں۔ "اس کے بعد سے، جموں و کشمیر میں منشیات کے استعمال سے نمٹنے کے لیے اہم کوششیں کی گئی ہیں۔ پچھلے سال، 2025 میں، ایک بڑی انسداد منشیات مہم چلائی گئی تھی، پولیس اور سیکورٹی فورسز کی کارروائیاں بھی موثر رہی ہیں،” ۔تاہم، سنہا نے وسیع تر سماجی ردعمل کی ضرورت پر زور دیتے ہوئے کہا کہ منشیات کے خلاف جنگ کو تیز کرنے کے لیے 100 دن کے پروگرام سمیت ایک جامع منصوبہ تیار کیا گیا ہے۔مہم کے آغاز کا اعلان کرتے ہوئے سنہا نے کہا کہ 11 اپریل کو جموں کے ایم اے سٹیڈیم میں ایک بڑے اجتماع کا منصوبہ بنایا گیا ہے جس میں سول سوسائٹی کے ارکان، سیاسی رہنما، ماہرین تعلیم اور کھلاڑی شرکت کریں گے۔ "اس دن، ہم منشیات کے استعمال کے خلاف عہد لیں گے اور ایک پدایاترا بھی نکالیں گے، یہ مارچ پورے جموں و کشمیر میں جاری رہے گا،” ۔عوام کی شرکت پر زور دیتے ہوئے لیفٹیننٹ گورنر نے کہا کہ یہ مہم کسی فرد تک محدود نہیں ہے بلکہ نوجوانوں کے مستقبل سے متعلق ہے۔ انہوں نے کہا’’ تقریبا ًہر روز دردناک واقعات رپورٹ ہو رہے ہیں، جو واقعی دل دہلا دینے والے ہیں،” ۔لوگوں کو اس پہل میں فعال طور پر شامل ہونے کی ترغیب دیتے ہوئے، سنہا نے مزید کہا، "یہ محض مارچ نہیں ہے، بلکہ ایک مقصد کے ساتھ ایک سفر ہے ،جموں و کشمیر کو منشیات سے پاک بنانا اور منشیات کے سمگلروں کے خلاف موثر کارروائی کو یقینی بنانا ہے۔” انہوں نے کہا کہ انتظامیہ نے مہم کو آگے بڑھانے کے لیے ایک جامع حکمت عملی تیار کی ہے جس میں پولیس اور سیکورٹی فورسز کے ساتھ تمام محکمے شامل ہیں۔انہوں نے مزید کہا، میں جموں و کشمیر کے ہر ضلع تک پہنچنے، پدا یاترا کے ذریعے اس مہم کو متحرک کرنے اور لوگوں سے براہ راست اپیل کرنے کی کوشش کروں گا۔
