نگران نیوز
سری نگر //لیفٹیننٹ گورنر منوج سنہا نے بدھ کے روز رام بن میں منشیات سے پاک جموں و کشمیر مہم کا آغاز کرتے ہوئے کہا کہ جب معاشرہ کسی مقصد کے لئے متحد ہوتا ہے تو قانون ہزار گنا مضبوط ہوتا ہے۔سنہا نے 11 اپریل کو جموں اور 13 اپریل کو کٹھوعہ سے 100 دن کی شدید انسداد منشیات مہم کا آغاز کیا۔رام بن میں ایک پد یاترا کی قیادت کرتے ہوئے اور ایک جلسہ عام سے خطاب کرتے ہوئے، لیفٹیننٹ گورنر نے کہا، "آج، میں نے ‘پد یاترا کی قیادت کی اور منشیات سے پاک جموں کشمیر مہم کے ایک حصے کے طور پر جلسہ سے خطاب کیا۔انہوں نے کہا کہ اس اقدام کا مقصد منشیات کی لت کو جڑوں سے ختم کرنا، معاشرے کو تبدیل کرنا اور نوجوانوں کے مستقبل کو محفوظ بنانا ہے۔سنہا نے کہا کہ "یہ کوئی معمولی واقعہ نہیں تھا۔ ہم منشیات کی لت کو جڑوں سے ختم کرنے، معاشرے کو تبدیل کرنے اور اپنے نوجوانوں کے مستقبل کو محفوظ بنانے کے عزم کے ساتھ جمع ہوئے تھے۔”انہوں نے منشیات کے استعمال کی لعنت سے نمٹنے کے لیے اجتماعی ذمہ داری کی ضرورت پر زور دیتے ہوئے کہا کہ ایک مضبوط سماجی تحریک قانونی اقدامات کو تقویت دے گی۔انہوں نے کہا”میں پختہ یقین رکھتا ہوں کہ جب معاشرہ کسی مقصد کے پیچھے متحد ہو کر کھڑا ہوتا ہے تو قانون ہزار گنا مضبوط ہو جاتا ہے۔ ہمیں ایک ایسا معاشرہ بنانا چاہیے جہاں ڈیلر قانون سے ڈرے، اور جو منشیات سے آزاد ہو جائے وہ خود پر، اپنے خاندان، اپنے معاشرے اور اپنی حکومت پر فخر محسوس کرے،” ۔
