نگران نیوز
سری نگر// جموں و کشمیر کے ادھم پور ضلع کے رام نگر علاقے میں پیر کو ایک مسافر بس پہاڑی سے نیچے جاگری، جس کے نتیجے میں 21 افراد ہلاک اور 30 سے زیادہ زخمی ہو گئے۔بس سڑک پرگرنے کے موقعہ پر ایک آٹو رکشہ سے ٹکرائیجس کے نتیجے میں کئی افراد کو چوٹیں آئیں تاہم وہ بال بال بچ گئے۔پہاڑی راستے سے گزرنے والے ایک فوجی قافلے نے بچا ئوآپریشن کیا جب صبح 10 بجے کے قریب رام نگر علاقے میں پہاڑی کی گورٹ گائوں کے قریب پرائیویٹ بس پر ڈرائیور کنٹرول کھو بیٹھا۔بس میں 50 سے زیادہ مسافر سوار تھے، جن میں زیادہ تر لوگ اپنے روزمرہ کے کام پر رام نگر سے ادھم پور جا رہے تھے۔پولیس نے بتایا”رام نگر سے ادھم پور جانے والی ایک بس پہاڑی راستے پر کنٹرول کھو بیٹھی اور پہاڑی سے نیچے جاگری۔ 17 مسافر جائے وقوعہ پر مردہ پائے گئے، جب کہ چار دیگر بعد میں ہسپتال میں زخموں کی تاب نہ لاتے ہوئے چل بسے”۔ عہدیداروں نے بتایا کہ2اور شدید زخمی افراد نے علاج کے دوران اودھم پور ضلع ہسپتال میں زخموں کی تاب نہ لاتے ہوئے دم توڑ دیا جس سے مرنے والوں کی تعداد بڑھ کر 21 ہوگئی۔انہوںنے کہا کہ مقامی باشندوں نے بچا ئوکے دوران اہم مدد کی۔ پولیس کی ٹیمیں بشمول سینئر سپرنٹنڈنٹ آف پولیس، ایس ایچ او رام نگر اور دیگر افسران موقع پر پہنچ گئے۔فوج کے جوانوں نے بھی مدد کی، اور مشترکہ ریسکیو آپریشن کیا گیا۔ پولیس کے ڈی آئی جی نے کہا کہ بعد میں ہائیڈرولک کرین کا استعمال کرتے ہوئے تباہ شدہ گاڑی کو اوپر لایا گیا۔ انہوں نے کہا کہ یہ ایک انتہائی افسوسناک واقعہ ہے۔ انہوںنے کہا کہ پولیس کے ڈائریکٹر جنرل نلین پربھات اور جموں زون کے انسپکٹر جنرل آف پولیس بھیم سین ٹوٹی فون پر صورتحال کی نگرانی کر رہے ہیں۔ فوج نے کہا کہ وہ اودھم پور سے رام نگر کی طرف جا رہے تھے، اور گاڑی کو پہاڑی سے نیچے گرتے ہوئے دیکھتے ہی فورا ًحرکت میں آگئے۔فوج نے بتایا کہ ” گاڑی تقریباً 100 میٹر کی بلندی سے گر گئی، ہم نے ریسکیو آپریشن شروع کیا، اس طرح بہت سی قیمتی جانیں بچائی گئیں جن میں مردوں اور عورتوں کی بڑی مشکل سے جانیں بھی شامل تھیں۔” سب ڈسٹرکٹ ہسپتال رام نگر میں کل 17لاشیں لائی گئیں۔ اسکے علاوہ دیگر43افراد کو زخمی حالت میں لایا گیا جن میں سے ایک شدید زخمی کو جموں میڈیکل کالج ریفر کیا گیا جبکہ 17زخمیوں کو ادہم پورہ ضلع ہسپتال منتقل کیا گیاجبکہ دیگر 17کو علاج معالجہ کرانے کے بعد رخصت کیا گیا۔ ادہم پور ہسپتال میں کل 49زخمیوں کو لایا گیا جن میں سے 4کی موت واقع ہوئی۔ فوج کا کہنا ہے کہ اس حادثہ میں بس سمیت آٹو رکشہ میں مجموعی طور 78افراد زخمی ہوئے ۔ انہوں نے کہا کہ 21کی موت واقع ہوئی جبکہ 57افراد زخمی ہوئے۔
