نگران نیوز
سری نگر// پٹیالہ ہائوس کورٹ نے جمعہ کو بارہمولہ کے رکن پارلیمان انجینئر رشید کی عبوری ضمانت کی عرضی کو خارج کر دیا۔ اس نے اپنے بیمار والد سے ملنے کے لیے عبوری ضمانت کی درخواست کی تھی، جو وینٹی لیٹر پر ہیں۔ سپیشل جج (این آئی اے)پرشانت شرما نے ملزمین کے وکیل اور قومی تحقیقاتی ایجنسی (این آئی اے)کے سپیشل پبلک پراسیکیوٹر(ایس پی پی)کی عرضیوں کو سننے کے بعد عبوری ضمانت کی عرضی کو خارج کردیا۔این آئی اے کے ایس پی پی گوتم خزانچی نے خفیہ رپورٹ کی بنیاد پر عبوری ضمانت کی درخواست کی مخالفت کی۔ تاہم، انہوں نے کہا کہ رشید کو حراست میں پیرول دیا جا سکتا ہے۔ایجنسی نے کہا کہ اگر ملزم کو حراست میں پیرول دیا جاتا ہے تو اسے کوئی اعتراض نہیں ہے۔ انجینئر کے وکیل ایڈوکیٹ وکیات اوبرائے نے این آئی اے کی عرضیوں کی مخالفت کرتے ہوئے کہا کہ خفیہ رپورٹ اس وقت تک قابل قبول نہیں ہے جب تک اسے ملزم کو فراہم نہیں کیا جاتا۔ "ہم رپورٹ کے حقائق کو مسترد کر رہے ہیں،۔وکیل نے یہ بھی کہا کہ ان کے والد وینٹی لیٹر پر ہیں۔ ان کا مزید کہنا تھا کہ پہلے اس کو الیکشن لڑنے کے لیے عبوری ضمانت دی گئی تھی لیکن اب والد کے شدید بیمار ہونے کے باوجود ان کی عبوری ضمانت کی مخالفت کی جا رہی ہے۔ 20 اپریل کو، عدالت نے اپنے بیمار والد سے ملاقات کے لیے عبوری ضمانت کی درخواست پر جواب داخل کرنے کے لیے این آئی اے کو وقت دیا تھا۔ عدالت سے اس بنیاد پر عبوری ضمانت کی درخواست کی تھی کہ ان کے والد شدید بیمار ہیں اور ہسپتال میں داخل ہیں۔ انجینئر فی الحال این آئی اے کے ذریعہ درج کردہ دہشت گردی کی فنڈنگ کیس کے سلسلے میں تہاڑ جیل میں عدالتی حراست میں ہے۔
