نگران نیوز
سری نگر// جموں شہر کے مضافات میں بنہ تلاب علاقے میں جمعہ کو ایک چھوٹے پل کا ایک حصہ منہدم ہو گیا، جس سے کم از کم تین سے چار مزدور ملبے کے نیچے دب گئے، جب کہ ایک زخمی مزدور کو بچا لیا گیا۔حکام نے پل کا حصہ گرنے کے بعد سڑک کا رابطہ بند کر دیا ۔پولیس نے بتایا کہ یہ واقعہ اس وقت پیش آیا جب مزدور پل کے قریب ایک ریٹیننگ وال کی مرمت کا کام کر رہے تھے جو پچھلے سال کے سیلاب میں تباہ ہو گیا تھا۔پولیس کے مطابق پل کا ایک حصہ اچانک پلنتھ سے نکل گیا جس سے جائے وقوعہ پر مصروف مزدور ملبے تلے دب گئے۔پولیس، فوج اور ریاستی ڈیزاسٹر رسپانس فورس (ایس ڈی آر ایف)کی ٹیموں نے ملبے تلے دبے ہوئے لوگوں کو نکالنے کے لیے امدادی کارروائیاں شروع کیں۔ انہوں نے ایک زخمی مزدور کو باہر نکالا اور اسے ہسپتال منتقل کیا۔جائے وقوعہ پر موجود مزدوروں کے اہل خانہ نے بتایا کہ واقعہ کے وقت جائے وقوعہ پر کام کرنے والے تقریباً چھ مزدور پل کے منہدم ہونے سے ملبے تلے دب گئے۔ لواحقین نے بتایا کہ دو مزدور نکلنے میں کامیاب ہو گئے جبکہ چار پھنس گئے۔پولیس نے بتایا کہ پھنسے ہوئے افراد میں ایک خاتون مزدور کا شوہر، ایک مستری، ایک غیر شادی شدہ مزدور اور ٹھیکیدار کا رشتہ دار شامل ہیں۔تاہم ملبے تلے دبے افراد کی صحیح تعداد کے بارے میں کوئی سرکاری تصدیق نہیں کی گئی ہے۔
