نگران نیوز
سری نگر //مغل روڑ پر برفباری کے دوران ایک کار کو المناک حادثہ پیش آیا جس کے نتیجے میں 4افراد لقمہ اجل بن گئے۔ بتایا جاتا ہے کہ ان میں باپ بیٹا شامل ہے۔لاشیں منگل کی سہ پہر ایک نالے سے بر آمد کی گئی ہیں۔پولیس نے منگل کی صبح ایک بیان میں کہا کہ مغل روڈ پر ایک گاڑی میں سفر کرنے والے چار افراد کے لاپتہ ہونے کی اطلاع ہے۔ اس اطلاع پر فوری کارروائی کرتے ہوئے ضلع پونچھ کی پولیس نے علاقے میں بڑے پیمانے پر تلاشی اور بچائو آپریشن شروع کیا۔تلاشی مہم کے دوران منگل کی دوپہر لاپتہ گاڑی کا سراغ چھتہ پانی کے قریب ایک نالے سے ملا۔ اطلاع ملنے پر ٹیمیں جائے وقوع پر پہنچ گئیں اور بعد میں تباہ شدہ گاڑی کے قریب دو لاشیں برآمد ہوئیں۔پولیس نے مزید کہا تھا کہ باقی لاپتہ افراد کی تلاش کے لیے سرچ آپریشن جاری ہے اور ان کا جلد از جلد پتہ لگانے کی تمام کوششیں کی جا رہی ہیں۔سہ پہر بعد گاڑی میں سوار مزید 2افراد کی لاشیں بھی اسی نالے سے بر آمد کی گئیں۔حکام نے بتایا کہ چاروں افراد پیر کی شام مغل روڈ پر سفر کے دوران برف باری کے دوران کار سمیت لاپتہ ہو گئے تھے۔ پولیس نے کہا کہ چاروں افراد کی شناخت کی جارہی ہے۔
