نگران نیوز
سری نگر//ٹریفک پولیس دیہی کشمیر نے پیر کو پلوامہ میں لیفٹیننٹ گورنر منوج سنہا کی قیادت میں 19 مئی کو جاری "نشا مکت بھارت ابھیان” کے تحت میگا پد یاترا سے پہلے تفصیلی ایڈوائزری جاری کی۔سینئر سپرنٹنڈنٹ آف پولیس، ٹریفک کی طرف سے جاری ایڈوائزری کے مطابق، ایونٹ کے دوران واگم سرکلر روڈ کراسنگ سے بونورہ کراسنگ سے مورن اور راج پورہ چوک تک گاڑیوں کی آمدورفت صبح 4 بجے سے شام 4 بجے تک معطل رہے گی۔عوام کو مشورہ دیا گیا ہے کہ وہ پروگرام کے دوران پلوامہ ٹائون کے اندر غیر ضروری سفر سے گریز کریں اور ٹریفک کی روانی کو یقینی بنانے کے لیے متعین ڈائیورژن راستوں پر عمل کریں۔ایڈوائزری کے مطابق، سری نگر، کاکاپورہ اور پانپور سے شوپیان اور پلوامہ جانے والے ٹریفک کو پرانے سرکلر روڈ کے ذریعے شوپیان اور لتر علاقوں کی طرف موڑ دیا جائے گا۔ اسی طرح نوگام، نیوہ اور وانپورہ سے شوپیانں اور پلوامہ کی طرف آنے والی گاڑیوں کو نیو سرکلر روڈ سے مورن -راج پورہ کے راستے موڑ دیا جائے گا۔شوپیاں اور پلوامہ سے سری نگر کی طرف جانے والی ٹریفک کو بنورہ کراسنگ پر پرانی اور نئی سرکلر سڑکوں سے موڑ دیا جائے گا۔ایڈوائزری میں مزید کہا گیا ہے کہ ضلع ہسپتال پلوامہ کی طرف جانے والی ایمبولینسوں اور دیگر طبی ایمرجنسی گاڑیوں کو صرف مورن چوک سے گزرنے کی اجازت ہوگی۔لیفٹیننٹ گورنر کی قیادت میں پد یاترا "نشا مکت جے کے ابھیان” کا حصہ ہے، جس کا مقصد منشیات کے استعمال کے خلاف بیداری پیدا کرنا، باز آبادکاری کو فروغ دینا، اور منشیات کی اسمگلنگ کے خلاف عوامی شرکت کو متحرک کرنا ہے۔
