نگران نیوز
سری نگر // اننت ناگ ضلع کے پہلگام علاقے میں ارو وادی روڈ پر گجر سنبل کے قریب بدھ کو ایک پرائیویٹ گاڑی گہری کھائی میں گرنے سے ایک خاتون سمیت دو افراد کی موت ہو گئی۔ حکام نے کہاکہ ایک آلٹو کار زیر رجسٹریشن نمبر JK03C-6737 ، کو اس وقت المناک حادثہ پیش آیا جب مبینہ طور پر ڈرائیور نے ارو سڑک پر موڑ کے قریب گاڑی پر سے کنٹرول کھو دیا۔ گاڑی سڑک سے پھسل کر گہری کھائی میں جاگری ۔حکام نے بتایا کہ جائے حادثہ سے دو لاشیں نکالی گئیں۔واقعے کے فورا ًبعد پولیس، ریسکیو اداروں اور مقامی رضاکاروں کی ٹیمیں موقع پر پہنچ گئیں اور وسیع پیمانے پر ریسکیو آپریشن شروع کیا۔ معلوم ہوا ہے کہ مہلوکین کا تعلق دیالگام اننت ناگ سے تھا۔ان میں سے ایک کی شناخت عمران حسین گنائی ساکن پیٹھ بگ یالگام کے بطور ہوئی ہے۔ خاتون کی شناخت نہیں ہوسکی ہے۔قبل ازیں ٹنگمرگ میں چار سیاح اور ایک مقامی ڈرائیور اس وقت زخمی ہو گئے جب وہ گاڑی میں سفر کر رہے تھے اور گاڑی کو حادثہ پیش آیا۔حکام نے بتایا کہ زخمیوں کو ہسپتال منتقل کر دیا گیا ہے جہاں ان کی حالت مستحکم ہے۔
