نگران نیوز
سری نگر//سری نگر پولیس نے منشیات سمگلروں کیخلاف جاری کارروائیوں کے سلسلے میں 3 کروڑ 34 لاکھ روپے سے زائد مالیت کی4 غیر منقولہ جائیدادیں ضبط کر لیں۔ پولیس ترجمان نے کہاکہ یہ کارروائیاں پولیس سٹیشن صفاکدل نے این ڈی پی ایس ایکٹ 1985 کی دفعہ 68 ایف کے تحت انجام دی۔ پولیس کا کہنا ہے کہ یہ جائیدادیں منشیات کی سمگلنگ سے حاصل ہونے والی آمدنی سے غیر قانونی طور پر بنائی گئی تھیں۔ضبط کی گئی جائیدادوں میں نواکدل میں واقع 3 منزلہ رہائشی مکان شامل ہے، جس کی مالیت تقریباً 1.19 کروڑ روپے ہے اور یہ عدنان لطیف شیخ ساکن براری پورہ کی ملکیت ہے۔ وہ ایف آئی آر نمبر 74/2026 میں دفعہ 8/22 این ڈی پی ایس ایکٹ کے تحت نامزد ملزم ہے۔اسی طرح پالپورہ نور باغ علاقے میں 7 مرلہ اور 50 مربع فٹ پر اراضی پر واقع ایک منزلہ مکان، جس کی مالیت 1.18 کروڑ روپے بتائی گئی ہے، دانیال احمد بیساتی کی ملکیت ہے، جو ایف آئی آر نمبر 24/2025 میں دفعات8/20,29 این ڈی پی ایس ایکٹ کے تحت ملزم ہے۔ترجمان نے مزیدکہاکہ برتھنہ، قمر واری میں تقریباً3.4 مرلہ پر اراضی پر واقع2 منزلہ مکان، جس کی مالیت 71.31 لاکھ روپے ہے، شاہد گل کی ملکیت ہے، جو ایف آئی آر نمبر 48/2026 میں دفعہ 8/20 این ڈی پی ایس ایکٹ کے تحت نامزد ہے۔جبکہ گوری پورہ سر ینگر میں 3 مرلہ اراضی پر مشتمل ایک منزلہ مکان، جس کی مالیت25 لاکھ روپے ہے، عادل احمد میر ساکن پالپورہ کی ملکیت ہے۔ وہ ایف آئی آر نمبر62/2025 میں دفعات8/20,29 این ڈی پی ایس ایکٹ کے تحت ملزم ہے۔پولیس نے بتایا کہ تمام ملزمان کو جائیدادوں کی ضبطی کے احکامات کی تعمیل کرا دی گئی ہے اور انہیں مجاز اتھارٹی کی پیشگی اجازت کے بغیر ان جائیدادوں کو فروخت، لیز، رہن، منتقل کرنے یا کسی تیسرے فریق کے حق میں استعمال کرنے سے روک دیا گیا ہے۔پولیس حکام کے مطابق اس کارروائی کا مقصد منشیات کے کاروبار سے وابستہ مالی نیٹ ورک کو ختم کرنا اور اس غیر قانونی تجارت سے حاصل ہونے والی آمدنی کے ذرائع کو بند کرنا ہے۔پولیس ترجمان نے کہا کہ سری نگر پولیس شہر کو منشیات سے پاک بنانے کے اپنے عزم پر قائم ہے اور عوام سے اپیل کی کہ منشیات فروشوں سے متعلق کسی بھی اطلاع کو قریبی پولیس اسٹیشن یا پولیس ہیلپ لائن کے ذریعے فراہم کریں۔
