نگران نیوز
سری نگر//مرکزی حکومت نے بھارتی حج عازمین کو بہتر، محفوظ اور سہل سفری و مذہبی خدمات فراہم کرنے کیلئے ڈیجیٹل نظام کو مزید وسعت دیتے ہوئے متعدد نئی سہولیات اور فلاحی اقدامات متعارف کرائے ہیں۔ لوک سبھا کو بدھ کے روز بتایا گیا کہ حج 2026 کے دوران عازمین کی سہولت کیلئے آن لائن خدمات، جدید رہائشی انتظامات، طبی سہولیات، انشورنس اور تیز رفتار ریل سروس سمیت کئی اہم اصلاحات نافذ کی گئی ہیں۔ مرکزی وزیر کرن رجیجونے کہا کہ حکومت نے حج انتظامات کو جدید خطوط پر استوار کرنے کیلئے "حج سوِدھا ایپ 2.0” متعارف کرائی ہے، جس کے ذریعے درخواستوں کی وصولی، ادائیگیاں، رہائش، سفری معلومات، شکایات کے ازالے اور دیگر ضروری خدمات ایک ہی پلیٹ فارم پر دستیاب ہیں۔انہوں نے کہا کہ اس ایپ کے ذریعے عازمین کو سفری شیڈول، رہائش کی تفصیلات، سامان سے متعلق معلومات، ہنگامی رابطہ نمبرز، ایس او ایس سہولت، طبی مشورے اور شکایات درج کرانے کی سہولت فراہم کی گئی ہے تاکہ وہ سفر کے ہر مرحلے میں ضروری معلومات تک فوری رسائی حاصل کر سکیں۔وزیر نے بتایا کہ حج درخواستوں کا پورا عمل اب مکمل طور پر آن لائن کر دیا گیا ہے جبکہ عازمین کا انتخاب شفاف کمپیوٹرائزڈ نظام کے تحت کیا جاتا ہے۔ عازمین محفوظ آن لائن ادائیگی کے ساتھ ساتھ اپنی پسندیدہ پروازوں کا انتخاب بھی کر سکتے ہیں۔ کرن رجیجو نے کہا کہ حکومت نے پاسپورٹ جمع کرانے کی روایتی شرط بھی ختم کر دی ہے اور اب پاسپورٹ کی تفصیلات ڈیجیٹل طریقے سے جمع کی جاتی ہیں۔کرن رجیجو نے مزید کہا کہ 65 سال یا اس سے زائد عمر کے عازمین کیلئے ایک معاون ہمسفر کے ساتھ سفر کرنا لازمی قرار دیا گیا ہے تاکہ دورانِ حج انہیں ضروری مدد اور سہارا میسر رہے۔
