نگران نیوز
سری نگر//جموں و کشمیر نے پردھان منتری ایمپلائمنٹ جنریشن پروگرام کے تحت گزشتہ پانچ مالی برسوں کے دوران موصول ہونے والی درخواستوں کے لحاظ سے ملک بھر کی تمام ریاستوں اور مرکز کے زیر انتظام علاقوں میں پہلی پوزیشن حاصل کی ہے۔ یہ جانکاری مرکزی وزیر جیتن رام مانجھی نے لوک سبھا میں فراہم کی۔ اعداد و شمار کے مطابق جموں و کشمیر میں مالی سال 2021-22 کے دوران 36 ہزار 181 درخواستیں موصول ہوئیں، جن میں سے 23 ہزار 955 منصوبوں کو منظوری دی گئی۔ 2022-23 میں 39 ہزار 341 درخواستیں موصول ہوئیں، جن میں 26 ہزار 777 منصوبے منظور کئے گئے۔ 2023-24 میں 38 ہزار 667 درخواستوں میں سے 25 ہزار 522، 2024-25 میں 28 ہزار 697 درخواستوں میں سے 17 ہزار 365 جبکہ 2025-26 میں 10 ہزار 411 درخواستوں میں سے 5 ہزار 363 منصوبوں کو منظوری دی گئی۔اعداد و شمار کے مطابق پانچ برسوں کے دوران جموں و کشمیر میں مجموعی طور ایک لاکھ 53 ہزار 297 درخواستیں موصول ہوئیں، جن میں سے 98 ہزار 982 منصوبوں کو بینکوں نے منظوری دی۔یو این ایس کے مطابق مرکزی حکومت کے مطابق مارجن منی سبسڈی بھی بڑی تعداد میں مستحقین کو فراہم کی گئی۔ مالی سال 2021-22 میں 21 ہزار 648 منصوبوں، 2022-23 میں 12 ہزار 23، 2023-24 میں 15 ہزار 65، 2024-25 میں 9 ہزار 863 اور 2025-26 میں 7 ہزار 837 منصوبوں کیلئے سبسڈی جاری کی گئی۔
