نگران نیوز
سری نگر//مرکزی وزیر داخلہ امت شاہ نے کہا ہے کہ 14 اگست 1947 ہندوستان کی تاریخ کے ایک انتہائی دردناک اور ہولناک باب کی یاد دلاتا ہے، جب لاکھوں افراد کو غیر انسانی مصائب کا سامنا کرنا پڑا اور کروڑوں لوگ اپنے گھروں، جائیدادوں اور عزیزوں کو چھوڑنے پر مجبور ہوئے۔یو این ایس کے مطابق مرکزی وزیر داخلہ نے کہا کہ تقسیمِ ہند کا یہ زخم تاریخ کبھی فراموش نہیں کرے گی۔ انہوں نے 1947 کی تقسیم کو کانگریس کی جانب سے دیا گیا ایسا تحفہ قرار دیا جس کے نتیجے میں لاکھوں افراد جان سے گئے، بے شمار خاندان اجڑ گئے اور کروڑوں لوگوں کو اپنے گھر بار، جائیداد اور عزیزوں سے محروم ہو کر نقل مکانی کرنا پڑی۔امت شاہ نے کہا کہ یومِ یادِ تقسیم کی ہولناکی منانے کا مقصد اس عظیم انسانی المیے کی یاد کو نئی نسل تک پہنچانا ہے، تاکہ مستقبل میں ملک کو تقسیم کرنے والی قوتیں کبھی کامیاب نہ ہو سکیں۔ انہوں نے کہا کہ ملک کی یکجہتی، قومی اتحاد اور بھائی چارے کو مضبوط بنانا وقت کی اہم ضرورت ہے۔انہوں نے تقسیم کے دوران جان گنوانے والوں اور ظلم و ستم کا سامنا کرنے والے تمام افراد کو خراج عقیدت پیش کرتے ہوئے کہا کہ اس سانحے کی یاد صرف تاریخ کا ایک باب نہیں بلکہ آنے والی نسلوں کے لیے ایک سبق بھی ہے۔
