نگران نیوز
سری نگر/ / محکمہ موسمیات نے جموں و کشمیر میں آئندہ چند روز کے دوران بارش اور گرج چمک کے ساتھ موسلا دھار بارش کی پیش گوئی کی ہے۔ محکمہ کے مطابق اگلے 24 گھنٹوں کے دوران بیشتر علاقوں میں ہلکی سے درمیانی بارش اور گرج چمک کے امکانات ہیں، جبکہ 31 اگست اور یکم ستمبر کو بارش کا دائرہ مزید وسیع ہونے کا امکان ہے۔محکمہ موسمیات مرکز سری نگر کی جانب سے اتوار کو صبح 11 بجے جاری موسمیاتی بلیٹن کے مطابق 30 اگست صبح ساڑھے 8 بجے سے 31 اگست صبح ساڑھے 8 بجے تک جموں و کشمیر میں متعدد مقامات پر ہلکی سے درمیانی بارش اور گرج چمک متوقع ہے۔محکمہ کے مطابق 31 اگست اور یکم ستمبر کو جموں و کشمیر کے بیشتر علاقوں میں ہلکی سے درمیانی بارش اور گرج چمک کے ساتھ موسم خراب رہ سکتا ہے۔ 30 اگست کو کشمیر میں چند مقامات پر جبکہ جموں میں نسبتاً زیادہ علاقوں میں بارش کا امکان ہے۔ 31 اگست کو کشمیر میں کافی وسیع علاقوں جبکہ جموں میں وسیع پیمانے پر بارش متوقع ہے۔ یکم ستمبر کو دونوں خطوں میں وسیع پیمانے پر بارش کا امکان ظاہر کیا گیا ہے۔30 اگست سے 5 ستمبر تک سات روزہ پیش گوئی کے مطابق کشمیر میں بارش کا سلسلہ پہلے مرحلے میں الگ تھلگ سے کافی وسیع علاقوں تک رہنے کا امکان ہے، جبکہ جموں میں ابتدائی تین دن کافی وسیع سے وسیع پیمانے پر بارش متوقع ہے۔ اس کے بعد بارش کی سرگرمی میں کمی آسکتی ہے۔2 ستمبر کو کشمیر اور جموں دونوں میں کافی وسیع علاقوں میں بارش کا امکان ہے، جبکہ 3 سے 5 ستمبر کے دوران کشمیر میں الگ تھلگ مقامات اور جموں میں چند علاقوں میں بارش متوقع ہے۔محکمہ موسمیات نے کشمیر میں 31 اگست اور یکم ستمبر کو الگ تھلگ مقامات پر گرج چمک، بجلی چمکنے اور 30 سے 40 کلومیٹر فی گھنٹہ کی رفتار سے تیز ہواؤں کا امکان ظاہر کیا ہے۔جموں خطے میں 30 اگست کو بھی گرج چمک، بجلی اور 30 سے 40 کلومیٹر فی گھنٹہ کی رفتار سے تیز ہوائیں چلنے کا امکان ہے۔ 31 اگست اور یکم ستمبر کو جموں کے بعض علاقوں میں شدید بارش کے ساتھ گرج چمک، بجلی اور تیز ہواؤں کی پیش گوئی کی گئی ہے۔ اس دوران حساس علاقوں میں لینڈ سلائیڈنگ، مٹی کے تودے گرنے اور اچانک سیلاب کا خطرہ بھی ظاہر کیا گیا ہے۔2 سے 5 ستمبر تک جموں خطے میں بھی بعض مقامات پر گرج چمک، بجلی اور 30 سے 40 کلومیٹر فی گھنٹہ کی رفتار سے تیز ہواؤں کا امکان برقرار رہے گا۔
