سری نگر/ / احتجاج کرنے والے میڈیکل انٹرنز کے ایک وفد نے جمعرات کو وزیر صحت سکینہ ایتو اور وزیر اعلیٰ کے مشیر سے ملاقات کرکے اپنے دیرینہ مطالبے اور انٹرن ڈاکٹروں کو درپیش مشکلات سے انہیں آگاہ کیا۔یو این ایس کے مطابق، ملاقات کے دوران وزیر صحت سکینہ ایتو نے انٹرنز سے کہا کہ حکومت کو وظیفے میں اضافے کے معاملے پر فیصلہ کرنے کے لیے ایک ماہ کا وقت دیا جائے۔ تاہم احتجاجی انٹرنز نے حکومت کی جانب سے دی گئی ایک ماہ کی مدت کو مسترد کرتے ہوئے واضح کیا کہ ان کی ہڑتال جاری رہے گی۔وفد کے ہمراہ موجود اے آئی ایم ایس اے کے انچارج ڈاکٹر محمد مومن خان نے کہا کہ انٹرنز پہلے ہی کافی عرصے سے انتظار کر رہے ہیں اور اب انہیں مزید یقین دہانیوں کے بجائے حکومت کی جانب سے واضح اور ٹھوس یقین دہانی درکار ہے۔انہوں نے کہا کہ اگر یہ معاملہ حل کیا جا سکتا ہے تو انٹرنز سے مزید ایک ماہ انتظار کرنے کے لیے کیوں کہا جا رہا ہے۔ ان کے مطابق، انٹرنز یہ جاننا چاہتے ہیں کہ معاملے کے حل میں حقیقتاً کتنا وقت لگے گا۔انٹرنز نے واضح کیا کہ وہ اپنی ہڑتال صرف اسی صورت میں واپس لیں گے جب حکومت کی جانب سے وظیفے میں اضافے کی تصدیق پر مبنی تحریری حکم نامہ جاری کیا جائے گا۔وفد میں اے آئی ایم ایس اے کے رہنما ڈاکٹر تصدق، ڈاکٹر عاقب، ڈاکٹر شہنواز، ڈاکٹر فراز اور ڈاکٹر زامین بھی شامل تھے۔ ڈاکٹر محمد مومن خان نے بھی انٹرنز کی کوششوں کی حمایت اور رابطہ کاری کی۔واضح رہے کہ جموں و کشمیر کے سرکاری طبی اداروں میں انٹرن ڈاکٹر وظیفے میں اضافے کے مطالبے کو لے کر احتجاج اور ہڑتال پر ہیں۔
