سرینگر بین الاقوامی فلم فیسٹیول، مقامی لوگوں کی بھاری شرکت

نگران نیوز
سری نگر/ / سرینگربین الاقوامی فلم فیسٹیول کے افتتاحی ایڈیشن کے تیسرے روز سری نگر کے ایس کے آئی سی سی میں مقامی اور غیر ملکی فلموں کی نمائز کیساتھ ساتھ معروف فلمسازوں اور گلوکاروں نے شرکت کی۔اس فیسٹیول کی خاص بات مقامی لوگوں کی بھاری شرکت ہے۔ پچھلے تین روز سے یہاں فلم سازوں کیساتھ جو بھی سیشن ہوئے ان میں مقامی نوجوانوں نے بڑی تعداد میں حصہ لیا۔ بدھ کے روز بھی یہی سلسلہ جاری رہا اور دن بھر مقامی نوجوانوں کے آنے کا سلسہ جاری رہا۔صحافیوں سے گفتگو کرتے ہوئے سپین کی فلمساز اینا ساورا نے کہا کہ فلمی میلوں کا دنیا بھر کے سنیما کو فروغ دینے اور مختلف ممالک کی فلموں اور فلم سازوں کو ایک دوسرے سے جوڑنے میں اہم کردار ہے۔انہوں نے کہا کہ کشمیر اور بھارت کا یہ ان کا پہلا دورہ ہے اور وہ مستقبل میں دوبارہ یہاں آنے کی امید رکھتی ہیں۔ انہوں نے سری نگر کو دیکھنے اور مقامی ثقافت سے واقف ہونے کی خواہش کا بھی اظہار کیا۔کشمیر کو فلم بندی کے لیے موزوں مقام قرار دیتے ہوئے ہسپانوی فلم ساز نے کہا کہ وادی میں فلم سازوں کے لیے بے پناہ امکانات موجود ہیں۔ انہوں نے کہا کہ یہاں خوبصورت مناظر، جھیلیں اور فلم بندی کے لیے بہترین قدرتی روشنی دستیاب ہے۔اینا ساورا نے کہا کہ کشمیر کو فلم سازی کے عالمی نقشے پر نمایاں کرنے کی ضرورت ہے۔ انہوں نے بتایا کہ انہوں نے کشمیر کی تصاویر اپنے ایک دوست کے ساتھ بھی شیئر کی ہیں، جس نے وادی کو مستقبل میں فلم بندی کے لیے ایک ممکنہ مقام کے طور پر تلاش کرنے کی تجویز دی۔معروف فلمساز اکبر خان نے کہا کہ کشمیر دنیا بھر میں فلمسازوں کی اولین ترجیح رہی ہے۔ انہوں نے کہا کہ وادی کے لوگوں کیساتھ زیادہ سے زیادہ رابطے رکھنے کی ضرورت ہے تاکہ یہاں کے ٹیلنٹ کو سامنے لایا جاسکے۔انہوں نے مزید کہا کہ یہاں ٹیلنٹ کی کوئی کمی نہیں ہے اور نوجوانوں میں سیکھنے کی لگن بھی ہے۔فلم شعلے کے فلمساز رمیش سپی نے کہا کہ وہ اس بات کی ضرور کوشش کریں گے کہ کشمیر میں فلم شوٹنگ کی جائے۔ انکا کہنا تھا کہ یہاں ماحول پر امن ہے، خوبصورتی لاجواب ہے جو فلمسازوں کیلئے بنیادی توجہ کا مرکز ہوتا ہے۔ انکا کہنا تھا کہ کشمیری لوگ بہت محنتی ہیں اور مہمان نوازی میں کوئی ثانی نہیں رکھتے۔ بالی ووڈ کی معروف گلوکارہ سندھی چوہان نے کہا کہ کشمیر جنت کا ٹکڑا ہے اور وہ یہاں آکر اپنے آپ کو خوش قسمت محسوس کررہی ہیں۔انہوں نے کہا کہ یہاں کی دل کو مو لینے والی قدرتی خوبصوتی کا کہیں جواب نہیں مل سکتا۔