نگران نیوز
سری نگر//لیفٹیننٹ گورنر ونے کمار سکسینہ نے بدھ کے روز جسٹس پشپیندر سنگھ بھاٹی کو جموں و کشمیر اور لداخ ہائی کورٹ کے چیف جسٹس کے عہدے کا حلف دلایا۔ لیفٹیننٹ گورنر ونے کمارسکسینہ، جنہیں منوج سنہا کی رُخصت کے دوران جموں و کشمیر کے لیفٹیننٹ گورنر کے فرائض انجام دینے کیلئے مقرر کیا گیا ہے، نے جسٹس پشپیندر سنگھ بھاٹی کو شیرکشمیر یونیورسٹی آف ایگریکلچرل سائنسز اینڈ ٹیکنالوجی (سکاسٹ) کشمیر کے شالیمار آڈیٹوریم جموں و کشمیر اور لداخ ہائی کورٹ کے چیف جسٹس کے عہدے کا حلف دلایا۔تقریب کا آغاز قومی گیت(وندے ماترم) کی پیشکش سے ہوا، جس کے بعد قومی ترانہ (جن گنامن )بجایا گیا۔ بعد ازاں جموں و کشمیر اور لداخ ہائی کورٹ کے رجسٹرار جنرل نے صدرِ جمہوریہ ہند کی جانب سے جاری کردہ تقرری کا باضابطہ حکم پڑھ کر سنایا گیا۔حکم پڑھنے کے بعد لیفٹیننٹ گورنر ونے کمار سکسینہ نے چیف جسٹس، جسٹس پشپیندر سنگھ بھاٹی کو عہدے کا حلف دلایا، جس کے بعد دونوں نے حلف نامے کے رجسٹر پر دستخط کئے۔ اس کے بعد لیفٹیننٹ گورنر ونے کمار سکسینہ نے جسٹس بھاٹی کو تقرری کے احکامات حوالے کئے۔تقریب کا اختتام قومی گیت اور قومی ترانے کی پیشکش کیساتھ ہوا۔تقریب میں وزیرِ اعلیٰ عمر عبداللہ، نیشنل کانفرنس کے صدر ڈاکٹر فاروق عبداللہ، اسپیکر عبدالرحیم راتھر، کابینہ کے وزراء ، جموں و کشمیر اور لداخ ہائی کورٹ کے جج صاحبان، چیف سیکریٹری اتل ڈولو، ڈائریکٹر جنرل آف پولیس نلین پربھات سمیت دیگر اعلیٰ افسران اور پولیس کے سینئر عہدیداران نے شرکت کی۔
