نگران نیوز
سری نگر/ / جموں و کشمیر حکومت کی یونین ٹیریٹری کابینہ کا اجلاس 10 ستمبر کو سری نگر میں منعقد ہونے جا رہا ہے، جس میں نوجوانوں کے لیے ہنرمندی کی ترقی، ہوم اسٹے پالیسی میں ترمیم، بنیادی ڈھانچے کے منصوبوں، صنعتی ترقی، زمین کی منتقلی اور مختلف انتظامی امور سمیت متعدد اہم تجاویز پر غور و خوض متوقع ہے۔کابینہ کا اجلاس جمعرات کو شام 4 بجے وزیر اعلیٰ عمر عبداللہ کی رہائش گاہ پر ہوگا، جہاں مختلف اہم تجاویز منظوری اور غور کے لیے پیش کیے جانے کا امکان ہے۔اجلاس میں زیر غور آنے والی اہم تجاویز میں مجوزہ ’’مشن اسکل‘‘، موجودہ ہوم اسٹے پالیسی میں ترمیم، جموں میں فلائی اوور کی تعمیر، سامبا میں صنعتی پارک کا قیام، بی ایس این ایل کے فور جی نیٹ ورک کی توسیع، سیلاب متاثرین کے لیے امداد اور سڑکوں کی تعمیر و مرمت سے متعلق اقدامات شامل ہیں۔کابینہ کے سامنے پیش کی جانے والی اہم تجاویز میں مسودہ اسکل ڈیولپمنٹ پالیسی بھی شامل ہے،۔مجوزہ پالیسی کا مقصد جموں و کشمیر کے نوجوانوں کے لیے پیشہ ورانہ اور ہنرمندی پر مبنی تربیت کے نظام کو مزید مضبوط بنانا ہے۔ اس کا دائرہ تعلیم کے مختلف مراحل بشمول اسکولوں، کالجوں اور یونیورسٹیوں تک بڑھائے جانے کی توقع ہے۔کابینہ جموں و کشمیر میں ہوم اسٹے اداروں سے متعلق نظرثانی شدہ پالیسی پر بھی غور کرسکتی ہے۔مجوزہ تبدیلیوں کا مقصد ہوم اسٹے کی رجسٹریشن اور تجدید کے عمل کو آسان بنانا اور جائیداد مالکان کو سیاحت کے شعبے میں زیادہ سے زیادہ شرکت کی ترغیب دینا ہے۔اہم تجاویز میں ہوم اسٹے رجسٹریشن کی مدت ایک سال سے بڑھا کر پانچ سال کرنے کی تجویز شامل ہے۔ کابینہ جموں میں مٹھی فلائی اوور کو شکنتلا تھیٹر سے جوڑنے والے مجوزہ فلائی اوور کے لیے انتظامی منظوری پر غور کرسکتی ہے۔ وجے پور علاقے میں پڈری مقام پر صنعتی پارک قائم کرنے کی تجویز بھی کابینہ کے سامنے پیش کی جاسکتی ہے۔ بی ایس این ایل کو سرکاری اراضی منتقل کرنے سے متعلق ہے تاکہ ان علاقوں میں موبائل رابطے کو بہتر بنایا جاسکے جہاں فور جی سہولت ابھی پوری طرح دستیاب نہیں ہے۔سوپور میں تقریباً تین کنال شملات اراضی کابینہ کی منظوری کے بعد محکمہ زرعی پیداوار کے حوالے کی جائے گی تاکہ وہاں سبزی منڈی قائم کی جاسکے۔کابینہ کے اجلاس میں مختلف انتظامی امور بھی زیر غور آئیں گے۔ کابینہ سیلاب سے متاثرہ افراد کو معاوضے کی ادائیگی اور مانسون کے بعد جموں و کشمیر بھر میں سڑکوں کی میکڈمائزیشن سے متعلق امور پر بھی غور کرسکتی ہے۔سڑکوں کی میکڈمائزیشن کا مقصد موسم سرما کے آغاز سے قبل سڑکوں کی حالت بہتر بنانا ہے، کیونکہ سردیوں میں موسمی حالات تعمیراتی اور مرمتی کاموں کو متاثر کرسکتے ہیں۔پالیسی اور ترقیاتی تجاویز کے علاوہ مختلف سرکاری محکموں کی جانب سے تیار کیے گئے چار بل بھی کابینہ کے سامنے پیش کیے جانے کی توقع ہے۔کابینہ سے منظوری ملنے کی صورت میں ان بلوں کو آئندہ جموں و کشمیر قانون ساز اسمبلی کے اجلاس میں پیش کرنے کی کارروائی آگے بڑھائی جائے گی۔
