سری نگر:مرکزی وزیر ماحولیات و جنگلات اور موسمیاتی تبدیلی بھوپندر یادو نے آج یہاں ایس کے آئی سی سی میں جنگلات ، حیاتیاتی تنوع اور موسمیاتی تبدیلی کے بارے میں ایک دِن کی ورکشا پ کا اِفتتاح کیا۔ورکشاپ کے اِفتتاحی سیشن کے دوران اَپنے خیالات کااِظہار کرتے ہوئے بھوپندر یادو نے کہا کہ حیاتیاتی تنوع کا تحفظ تب ہی ہوگا جب ہم مقامی کمیونٹی کو مضبوط کریں گے ۔ اُنہوں نے مزید کہا کہ جنگلات اور مقامی کمیونٹی کا تحفظ گہرا باہم جڑا ہوا ہے اور اِس لئے یہ ضروری ہے بائیو ڈائیورسٹی کے تحفظ کے لئے مقامی کمیونٹی کو مضبوط کیا جائے۔مرکزی وزیرموصوف نے کہا کہ بائیو ڈائیورسٹی کے تحفظ کے لئے پی آر آئی اِداروں او ردیگر مقامی کمیونٹی کے نمائندوں کو اَپنے اَپنے علاقوں میں شامل ہونا چاہیئے۔وزیر موصوف نے جنگلات کے منسلک محکموں کے کردار کو سراہا ۔حیاتیاتی تنوع کے تحفظ کی کامیابی کے لئے اِنتہائی محروم اَفراد کی شرکت یقینی بنائی جائے۔اُنہوں نے محکمہ جنگلات کی بائیو ڈائیورسٹی مینجمنٹ کمیٹیوں کی تشکیل اور گائوں کی پنچایتوں سے جوڑنے کی کوششوں کو سراہا۔اُنہوں نے مزید کہا کہ وزارت ماحولیات و جنگلات اور موسمیاتی تبدیلی 14ٹائیگر رِیزوں کے لئے بین الاقوامی پہچان حاصل کرنے پر کام کر رہا ہے اور شیر کے تحفظ میں جنگل فارسٹ اہلکاروں کی قربانیوں کو بھی تسلیم کیا جائے گا۔اُنہوں نے فرنٹ لائن فارسٹ فورس کو مضبوط بنانے کے لئے اِقدامات کرنے پر محکمہ جنگلت کی کوششوں کو بھی سراہا اور ان کی قربانیوں پر مرکوز فلم ’’جنگل کے رکھوالے ‘‘ کو بھی سراہا۔مرکزی وزیر بھوپندر یادو نے جنگلات ، حیاتیاتی تنوع اور موسمیاتی تبدیلی پر ورکشاپ کا حوالہ دیتے ہوئے اَپنی قومی سطح پر متعین شراکتوں ، اِنٹرنیشنل سولر الائنس کے ساتھ قابل تجدید توانائی کے حصول میں بھارت کی کامیابیوں پر روشنی ڈالی۔اُنہوں نے متبادل توانائی کے دائرہ کار میں خاطر خواہ اِضافہ کے لئے وزیر اعظم کے شروع کردہ قومی ہائیڈروجن مشن کو بھی اُجاگر کیا ۔ اُنہوں نے ورکشاپ کے معزز مندوبین ، ماہرین ،تحقیقی اداروں اور فیلڈ کے شرکا ٔ کو مشورہ دیا کہ وہ جدید حل کی طرف کام کریں تاکہ ترقی اور تحفظ کے درمیان توازن ہمیشہ برقرار رہے۔دورانِ ورکشاپ وزیر موصوف نے ’’ فارسٹرس ٹریننگ کورس‘‘ اور ’’ پروٹیکشن اور آبی ذخائر کا تحفظ : بائیو فنسنگ کا اِستعمال او رکیچ منٹ ائیریا ٹریٹمنٹ ‘‘ پر ایک کتابچہ بھی جاری کیا۔اِس کے علاوہ ’’ جنگل کے رکھوالے‘‘ کے عنوان سے ایک مختصر فلم جو فرنٹ لائن جنگلاتی عملے کو درپیش چیلنجوں کو درشاتی ہے اور ان کی سخت ذمہ داریوں اور قربانیوں کی عکاسی بھی کرتی ہے۔اِس سے قبل مرکزی وزیر موصوف نے محکمہ جنگلات کی جانب سے قائم کردہ سٹالوں کا دورہ کیا ۔اُنہوں نے این جی اوز کے نوجوان رضاکاروں کے ساتھ ساتھ محققین کی حوصلہ اَفزائی کی ۔اِس موقعہ پر وزیر موصوف نے ایس کے آئی سی سی کے لان میں چنار کا پودا بھی لگایا۔بعد میں مرکزی وزیر موصوف نے محکمہ جنگلات کے سینئر اَفسران کے ساتھ ایک میٹنگ کی صدارت کی اور محکمہ مختلف سکیموں کے تحت حصولیابیوں اور پیش رفت کا جائزہ لیا۔
